''Eyüpspor'' ilə 2:2 bərabərə qalaraq çempionluq yarışında çox mühüm 2 xal itirən ''Qalatasaray''da bir məqam diqqəti cəlb etməyə başlayıb.

Okan Buruk Avropa Liqasında ''Elfsborq''a qarşı oyundan etibarən 3 müdafiəçili, yəni 3-4-1-2 sisteminə üstünlük verməyə başlayıb. Həmin vaxtdan bu yana yalnız ''Beşiktaş''la derbi istisna olmaqla komanda bütün oyunları 3 müdafiəçili taktika ilə keçirib.

Düzdü, ''Aslan'' bu taktika ilə keçirdiyi 6 qarşılaşmanın heç birində məğlub olmayıb (4 qələbə, 2 heç-heçə). Amma necə deyərlər, medalın o biri üzü də var. ''Qalatasaray'' bu sistemlə ''Elfsborq'' (4:3), ''Tottenhem'' (3:2), ''Alkmaar'' (1:1), ''Samsunspor'' (3:2), ''Eyüpspor'' (2:2) və ''Bodrum''a (1:0) qarşı keçirdiyi oyunların yalnız birində qapısını toxunulmaz saxlayıb və ümumilikdə 10 qol buraxıb! Bu da o deməkdi ki, ''sarı-qırmızılar'' artıq hər oyuna orta hesabla 1,6 qol buraxmağa başlayıblar.

Halbuki komanda adəti üzrə 4 müdafiəçi ilə oynadığı mövsümün ilk 12 rəsmi matçında yalnız 12 qol buraxmışdı. Bu da orta hesabla hər oyuna 1 buraxılan qol demək idi. Təcrübəli məşqçinin yenidən əvvəlki sistemə dönəcəyi bildirilir.

ƏLİ