Bu həftəsonu Türkiyə çempionatında mövsümün ən önəmli oyunlarından biri keçiriləcək.

"Football-plus.az" xəbər verir ki, son bir həftədə əvvəlcə Avropa Liqası, sonra da Türkiyə kuboku olmaqla 2 turnirdə mübarizəni dayandıran, superliqada isə “Fənərbaxça” ilə amansız çempionluq mübarizəsi aparan “Qalatasaray” “Beşiktaş”ın qonağı olacaq. “Sparta” və “Fatih Karagümrük”ə məğlubiyyətlərdən sonra gözünü yalnız superliqaya dikən “Cim-Bom”u çox ciddi sınaq gözləyir. Məsələ burasındadı ki, həm son illərdə “Qalatasaray” bu rəqibə səfərdə, adətən, uduzur, həm də Fernando Santuşun təyinatından bəri “Qartal”ın müdafiəsi keçilməz qalaya çevrilib. Təkcə bir faktı vurğulayaq ki, “ağ-qaralar” indiyə qədər Santuşun başçılığı altında doğma “Tüpraş Stadionu”nda keçirdikləri 6 rəsmi oyunun heç birində (!) qol buraxmayıb. Komanda bu müddətdə evdə superliqada “Fatih Karagümrük” (3:0), “Adana Dəmirspor” (0:0), “Trabzonspor” (2:0), “Konyaspor” (2:0), eləcə də kubokda “Eyupspor” (4:0) və yenə də “Konyaspor”a (2:0) qarşı oyunlarda qol buraxmayıb. Ümumilikdə “Qartal” portuqaliyalı çalışdırıcı ilə keçirdiyi 11 rəsmi oyunun 8-də qapısını toxunulmaz saxlayıb. Bundan başqa, “Qalatasaray” indiyə qədər heç vaxt “Tüpraş Stadionu”nu fəth edə bilməyib! “Beşiktaş” 2016-cı ilin aprelindən ev oyunlarını bu arenada keçirir və indiyə qədər burda “Qalatasaray”a qarşı 7 oyundan 6 qələbə, 1 bərabərliklə ayrılıb. Özü də həmin bərabərlik komandaların bu stadiondakı ilk oyununda – 2016-cı ilin sentyabrın 24-də qeydə alınlıb (2:2). Başqa sözlə desək, “Beşiktaş” prinsipial rəqibini son 6 mövsümün hər birində evə əliboş yola salıb! Hərçənd bir məqamı unutmayaq ki, “Fənərbaxça” da bu mövsümə qədər bu stadionda “Beşiktaş”ı superliqa çərçivəsində məğlub edə bilməmişdi. Amma bu seriya cari mövsümün ilk dövrəsindəki derbidə qırıldı. Son 10 mövsümə nəzər salsaq, “Qalatasaray” “Beşiktaş”ı səfərdə cəmi 2 dəfə məğlub edib. Okan Burukun dönəmində Türkiyə çempionatında “Aslan” prinsipial rəqiblərlə oyunlarda çox yaxşı təsir bağışlayır. Son 2 mövsümdə komanda “Fənərbaxça”, “Beşiktaş” və “Trabzonspor”a qarşı keçirdiyi 10 superliqa matçının yalnız birində məğlub olub (7 qələbə, 2 heç-heçə). Həmin yeganə məğlubiyyət ötən mövsüm məhz “Beşiktaş”la səfərdəki oyunda qeydə alınıb (1:3).
Hakimə gəlincə, ilin ilk böyük İstanbul derbisi Xəlil Umut Melerə tapşırılıb. Bilindiyi kimi, bu ədalət təmsilçisi dekabrda “Ankaragücü”nün artıq sabiq prezidenti Faruk Koca tərəfindən yumruqlanaraq fiziki təzyiqə məruz qalmışdı. Buna baxmayaraq, Meler hazırda Türkiyənin bir nömrəli hakimi sayılır. Maraq üçün bildirək ki, indiyə qədər “Beşiktaş” 37 yaşlı ədalət təmsilçisinin idarə etdiyi 23 qarşılaşmadan 9 qələbə, 5 heç-heçə, 9 məğlubiyyət, “Qalatasaray” isə 23 oyundan 17 qələbə, 4 heç-heçə, 2 məğlubiyyət ilə ayrılıb.