''Qalatasaray''ın baş məşqçisi Okan Buruk dünən ''Hatayspor''a məğlubiyyətin ardından baş tutan mətbuat konfransında maraqlı bir məqama toxundu.

O, bu mövsüm ÇL matçlarından sonra yalnız 3 gün istirahət etmələrindən şikayətlənərək komandasına qarşı haqsızlıq edildiyini, digər kollektivlərə 4 günlük istirahət fürsəti yaradıldığını vurğuladı. Burukun təqvimlə bağlı şikayətindən sonra türkiyəli həmkarlarımız İstanbul nəhənglərinin təqvimini araşdırıblar. Məlum olub ki, əksinə ən çox dincələn elə ''Qalatasaray''dı! ''Sarı-qırmızılar'' ÇL-in qrupunda 4 oyun keçiriblər. Komanda 2 dəfə ÇL-dən sonra 3 gün, 2 dəfə də 4 gün ara verərək superliqa matçına çıxıb.

Müqayisə üçün deyək ki, Konfrans Liqasının qrupunda oynayan ''Fənərbaxça'' üçün bu mövsüm 4 günlük istirahət şansı olmayıb. Komanda KL-in qrupunda keçirdiyi 4 oyunun hamısında yalnız 3 gündən sonra meydana çıxmalı olub. KL-də çıxış edən İstanbulun digər nəhəngi ''Beşiktaş'' isə qrupda keçirdiyi 4 matçın 3-də 3 günlük aradan sonra oynamalı olub. Yalnız bir dəfə ''Qartal''ın 4 günlük istirahət şansı olub.

Başqa sözlə desək, Okan Burukun şikayətinin əsassız olduğu üzə çıxıb.

ƏLİ