12-ci tur intizam sanksiyaları baxımından o qədər də qorxunc təsir bağışlamadı.

10 komandadan yalnız “Səbail” cəzalanmadı. Futbolçulara 20 sarı, 1 qırmızı vərəqə göstərildi. Və hakim qərarları da hansısa kəskin reaksiya doğurmadı.

Neftçi – Araz-Naxçıvan, RƏŞAD ƏHMƏDOV
Oyun gərgin mübarizə şəraitində keçmədi. Qonaqlar hesabı açandan sonra müdafiə olunmağa, nəyin bahasına olur-olsun, qol buraxmamağa köləndi. Belədə “qırmızı-ağlar”ın çox kobud oyun tərzinə şahidlik etdik. Bu üzdən göstərilən sarı vərəqələr yerinə düşdü. Elə Turanın “qırmızı”sı da haqlı idi. Hakimin idarəçiliyindən narazı qalan tərəf isə “Neftçi” oldu. Düzü, meydan sahiblərini anlayışla qarşılamaq olar. Ona görə ki, qonaq futbolçular dəfələrlə topu oyuna gec daxil etdi, həmçinin qayda pozuntularına görə normadan çox vaxt xərcləndi. Yəni Rəşad Əhmədov 2-ci ikinci hissəyə 4 dəqiqədən də artıq vaxt əlavə edə bilərdi.

Şamaxı – Zirə, İNQİLAB MƏMMƏDOV
“Şamaxı” növbəti dəfə zəif oyunla yadda qaldısa, “Zirə” istədiyi qələbəni təmin etdi. FİFA referisi nə meydan sahiblərinin, nə də qonaqların qayda pozuntularına göz yumdu. Lazımi qərarlar lazımi anda verildisə, baş məşqçilərdən də etiraz eşitmədik. Halbuki həm Rəşad Sadıqov, həm də Ayxan Abbasov bu mövzuda sözünü deməkdən çəkinmir. O başqa məsələ ki, şamaxılı azarkeşlər hakimlər briqadasını fitə basdı, nalayiq ifadələr işlətdi. Çünki onlar ədalət təmsilçisinin “şirlər”in təmiz qolunu saymadığını düşünürdü. Xatırladaq ki, həmin epizodda Benteke oyundakənar vəziyyətdə idi. Hər halda, “fit sahibi” hansısa kobud səhvlə yadda qalmadı.

Sumqayıt – Sabah, RƏVAN HƏMZƏZADƏ
“Kimyaçılar”ın planı iddialı rəqibi büdrətmək idi ki, “bayquşlar” özü buna şərait yaratdı. Baxımlı oyuna şahidlik etməsək də, gərginlik var idi. Matç ərzində soyuqqanlılığıyla diqqəti çəkən referi futbolçulara güzəşt etmədi. Digər tərəfdən, oyunçular da cəzalanmamaq üçün əlindən gələni əsirgəmədi. Nəticədə Rəvan Həmzəzadənin işi asanlaşdı. Onun itirilən vaxtı bərpa edərkən, oyunçulara “yerini göstərərkən” hansısa ədalətsizliylə yol verdiyini desək, yanılarıq.

Turan Tovuz – Qarabağ, ƏLİYAR AĞAYEV
Bu möhtəşəm oyunda qalib müəyyənləşmədi. Azarkeşlərin dəstəyi, komandaların inamlı çıxışı tribunalarda xüsusi ab-hava yaratdı. Əliyar Ağayevin başçılıq etdiyi hakimlər briqadasının nəticəyə təsir edən ciddi səhvi olmadı. 51-ci dəqiqədə Faiq Hacıyev təhlükəni sovuşdurarkən top əlinə dəydi. FİFA referisi bu epizodu penalti kimi dəyərləndirmədi. Gərgin keçən mübarizədə Əliyar bəy cəmi iki dəfə əlini cibinə atmalı oldu. Ümumilikdə referi oyunu ideal idarə etdi.

Kəpəz – Səbail, KAMAL UMUDLU
Kamal Umudlu qarşılaşmanı pis idarə etmədi. Komandaların açıq oynamasına şərait yaradan hakim 4 futbolçuya sarı vərəqə göstərdi. Qonaqlar ilk dəqiqələrdən mübarizə əzmini ortaya qoysalar da, hansısa aqressivliyin şahidi olmadıq. Kamal bəyin qərarları və mövqe seçimi doğru idi. Referi “oyunun ipini əlində saxlamağa” çalışdı. Umudlunun vəzifəsinin öhdəsindən qüsursuz gəldiyini deyə bilərik.