22 sarı, 1 qırmızı vərəqə, heç bir komandanın cəzadan yaxa qurtara bilməməsi – turun intizam tədbirlərinin rəqəmli yekunu belədi.

Özü də maraqlıdı ki, 9 sarı, 1 qırmızı vərəqə “Səbail” – “Şamaxı” oyununa təsadüf etdi. Adətən, hakimlərə tənqidi münasibəti ilə seçilən Ayxan Abasov “hakimlikdən danışmayacam, hər tur danışmaq bir az pis olur” deyirsə, deməli, qəlbinin dərinliklərində məğlubiyyətin heç də Əliya Ağayevin qərarları ilə bağlı olmamasıyla barışıb.

Səbail – Şamaxı, ƏLİYAR AĞAYEV
FİFA referisi 19-cu dəqiqədən 81-ci dəqiqəyə qədər vərəqə payladı. Cari mövsümdəki 3-cü qırmızı vərəqə də Əliyar bəyin payına düşdü. Ayxan bəyin onun idarəçiliyinə münasibətini girişdə xatırlatdım, Şahin Diniyev də “Ağayev oyunu normal idarə etdi” deməklə kifayətləndi. Ağayevin qərarları bütövlükdə şübhə doğurmasa da, bu statusda birinin heç də liderlərin qarşılaşmadığı oyunda ehtirasları yalnız cəza tədbirləri hesabına sakitləşdirməsi heç də xoş hal deyil.

Sabah – Araz–Naxçıvan, CAVİD CƏLİLOV
Azarkeşlər daha baxımlı və həyəcanlı matça ümid edirdi. Lakin komandaların qarşılıqlı qollardan sonra müdafiə olunmağa üstünlük verməsi həmin gözləntiləri puç etdi. Ağır və cansıxıcı oyunu idarə etmək Cavid bəy üçün çətin olmadı. Yenə də onun xeyli məqamda futbolçulara güzəşt etdiyini deyə bilərik. Gah qayda pozuntularına göz yumdu, gah da kobud oyuna şərait yaratdı. Hətta qapıçıların topu oyuna gec daxil etməsinə də səs çıxarmadı. Baş məşqçilər bundan narazı qalmasa da, azarkeşlər səs-küy salaraq Cəlilovun üzərində təzyiq yaratdı. Hər halda, ədalət təmsilçisi bunları nəzərə almadan, sona qədər eyni tempi qorudu. Onun ideal idarəçiliklə yadda qaldığını demək doğru olmaz.

Sumqayıt – Qarabağ, ELÇİN MƏSİYEV, KAMRAN ƏLİYEV
Oyunun taleyini qonaqların yeganə qolunun həll etməsi matçın baxımsız keçməsi demək deyil. Əvvəldən sona qədər istər meydanda, istərsə də tribunalarda gərgin mübarizəyə şahidlik etdik. FİFA referisi Elçin Məsiyev dinamik matçın öhdəsindən layiqincə gəldi. Komandalar kobudluğa yol vermir, qaydalara maksimum əməl etməyə çalışırdı. Yenə də qaçılmaz səhvlər oldu ki, ədalət təmsilçisi dərhal cəza tədbirlərinə əl atdı. Birinci hissənin gedişində zədələnən Məsiyevin missiyasını Kamran Əliyev də qüsursuz davam etdirdi. Beləcə ötən həftə hakimləri günahlandıran Qurban Qurbanov və Samir Abasov bu dəfə narazı qalmadı.

Kəpəz – Neftçi, RƏŞAD ƏHMƏDOV
Tovuzda keçirilən açılış matçı Rəşad Əhmədovun rəhbərlik etdiyi hakimlər briqadasına tapşırılmışdı. Baxımlı oyuna şahidlik etdiyimizə şübhə yoxdu. Məhsuldar keçən oyunda hansısa aqressivliyin şahidi olmadıq. Rəşad bəy cəmi üç dəfə əlini cibinə salmalı oldu. Uzatma dəqiqələrində Ağadadaş Salyanskinin vurduğu qol bir qədər şübhəli görünsə də, referi laysmanın da yardımı ilə mərkəzi göstərdi.

Turan Tovuz – Zirə, RƏVAN HƏMZƏZADƏ
Hər iki komandanın yüksək yerlər uğrunda mübarizə apardığı sirr deyil. Oyun yetərincə maraqlı alındı. Tovuzlu futbolsevərlər son turlarda hakimlər tərəfindən doğma komandalarına qarşı haqsızlıq edildiyini düşünürdü. Rəvan bəy belə iddiaların hədəfi olmadı. Referi futbolçulara 3 sarı vərəqə göstərdi ki, hamısı haqlı idi.