Çempionatda mübarizə qızışdıqca hakimlərlə bağlı narazılıqların sayı artır.

Özü də maraqlıdı ki, söhbət təkcə nəticəyə təsir edən səhvlərdən getmir. Hakimlərimizin idarəçilik üslubu baş məşqçiləri bezdirib. Onların gileyində həqiqət payı çoxdu. Qurban Qurbanov İnqilab Məmmədovu oyunun dinamikasına zərər vurmaqda, Samir Abasov Cavid Cəlilovu komandasını qələbədən məhrum etməkdə, Ayxan Abbasov isə Tural Qurbanovu ümumilikdə oyunu pis idarə etməkdə suçladı.
Hesabat turunda ümumilikdə 27 sarı vərəqə göstərildi ki, bunların 17-si iki oyunun payına düşdü. “Neftçi” – “Sumqayıt” oyununda futbolçular 8, “Şamaxı” – “Turan Tovuz” oyununda isə 9 dəfə cəzalandırıldı.

Şamaxı – Turan Tovuz, TURAL QURBANOV
Artıq ilk yarıda 5 dəfə əlini cibinə salan Qurbanov bu oyunda ehtiraslarının gərginləşməsinin əsas səbəbkarı oldu. Köməkçiləri ilə əlaqəsi hədsiz aşağı səviyyədə idi, dəfələrlə referi bir, laysman başqa qərar verirdi. Bəzi anlarda elə təəssürat yaranırdı ki, ümumiyyətlə, hakim oyunun axarına nəzarəti əldən verib. 42-ci dəqiqədə İlkin Muradovun zərbəsindən sonra top cərimə meydançasında dayanan Alexandro Serraronun əlinə yox, çiyninə dəymişdi, yəni Qurbanov penalti verməməklə düz etdi. Uzatma dəqiqələrindəki penalti qərarı da doğru idi.

Neftçi – Sumqayıt, CAVİD CƏLİLOV
Komandalar yetərincə çox qayda pozuntusuna yol verdi. Cavid Cəlilov 8 dəfə əlini cibinə saldı və maraqlıdı ki, sarı vərəqələrin yalnız ikisi “Neftçi”nin futbolçularına göstərildi. Həqiqətən də, hakim “ağ-qaralar”ın sərt oyun tərzinə göz yumsa da, “kimyaçılar”ın qol-qanad açmasına imkan vermədi. 63-cü dəqiqədə Roy Kehat Yuri Matiasla mübarizə zamanı yerə yıxıldı. Çoxu bu epizoda görə penalti təyin etməyən hakimi qınadı. Lakin diqqətlə izləsək, Yurinin məhz topa müdaxilə etdiyini görə bilərik. Bəlkə də Samir Abasov məhz bu üzdən hakimin qələbə qazanmalarına mane olduğunu bildirdi. Cəlilovu tərəfkeşliklə suçlamırıq. Lakin vəzifəsinə daha məsuliyyətli yanaşmalı, özünü baş məşqçilərin tənqid hədəfi etməməlidi. Onun fəaliyyətini ümumilikdə ortabab saya bilərik.

Qarabağ – Sabah, İNQİLAB MƏMMƏDOV
Turun mərkəzi matçını FİFA referisi idarə etdi. Özü də demək olar ki, qüsursuz! Əlbəttə, bunda həm “köhlən atlar”ın, həm də “bayquşlar”ın intizamlı oyununun payı var. Yenə də İnqilab bəyi hansısa ciddi səhvinə görə mühakimə edə bilmərik. Düzdü, Qurban Qurbanov ədalət təmsilçisinin idarəçiliyindən narazı qaldı. Səbəb onun tez-tez oyunu saxlaması və matçın dinamikasına zərbə vurması idi. Lakin buna görə məhz Məmmədovu günahlandırmaq insafsızlıq olar. “Fit sahibi” qaydalara uyğun davrandı – kobudluğa şərait yaratmadı, ciddi səhvlər zamanı güzəşt etmədi. Yəqin ki, komandası məğlub durumda olan Krunoslav Renduliç də fasilələrn yaranmasını istəmirdi. Amma bu, sırf referinin yox, futbol təsərrüfatımızın problemidi.

Araz-Naxçıvan – Səbail, RAUF ALLAHVERDİYEV
Turun açılış matçı Rauf Allahverdiyevin rəhbərlik etdiyi hakimlər briqadasına tapşırılmışdı. Nominal meydan sahibləri ilk dəqiqədən mübarizə əzmini ortaya qoysalar da, hansısa aqressivliyin şahidi olmadıq. Baxımlı oyuna şahidlik etdiyimizə şübhə yoxdu. “Səbail” autsayder olmasına baxmayaraq, hücum etməkdən çəkinmədi. 55-ci dəqiqədə top cərimə meydançasında Amir Bilalinin əlinə dəydi. Rauf Allahverdiyev VAR-a baxandan sonra penalti nöqtəsini göstərdi ki, bu da haqlı qərar idi.

Zirə - Kəpəz, RAUF CABBAROV
Oyun yetərincə maraqlı oldu. “Zirə”nin baş məşqçisi hakimin oyunu tez-tez dayandırmasına görə etiraz edirdi. 67-ci dəqiqədə “Zirə” növbəti dəfə fərqlənsə də, yan xətt hakiminin bayrağı havada idi. Daha dəqiqi, Turan Manafovun topu itirməsindən istifadə edən Davit Volkov dərhal Rüstəm Əhmədzadəyə ötürmə verdi. Rüstəm topu tora qovuşdursa da, Volkovun ötürməsi zamanı top xətti keçmişdi. Referinin qərarları və mövqe seçimi doğru idi. Hakimin çiynindəki “yük” də yüngül oldu. Rauf bəy cəmi iki dəfə əlini cibinə salmalı oldu.