Həftəiçi keçirilən görüşlər bir-birindən maraqlı alındı.

“Qəbələ”nin “Zirə”ni darmadağın etməsi gözlənilməz idisə, “Qarabağ”ın çempion olacağına, demək olar ki, hamı inanırdı. “Sumqayıt” - “Neftçi” matçında azarkeşlər Kamal Umudlunun qərarlarına etiraz etdilər. “Şamaxı” - “Səbail” qarşılaşmasında da İnqilab Məmmədovun penaltini təyin etməməsi şübhəli məqam kimi diqqəti çəkdi. Ümumiyyətlə, referilər bu görüşlərdə əllərini 25 dəfə ciblərinə saldılar. Vərəqələrdən 23-nün rəngi sarı, 2-nin rəngi qırmızı oldu. Turun ən centlmen komandası “Zirə”di. Rəşad Sadıqovun komandası cəmi 1 “sarı” ilə cəzalandı. Həftənin ən kobudu adına isə “Neftçi” layiq görüldü. “Ağ-qaralar”ın 5 futbolçusu sarı vərəqə ilə cəzalandı.

Reportyorlarımızın qeydlərinə keçid alaq.

İNQİLAB MƏMMƏDOV, Şamaxı - Səbail

Qolsuz bitsə də, çox sürətli və dinamik, azarkeşlərə zövq verən qarşılaşma oldu. Buna baxmayaraq, hakimlərin üzərinə çox yük düşmədi. Sadəcə, 82-ci dəqiqədə top “Səbail”in cərimə meydançasında müdafiəçinin əlinə dəydi. Bu epizodda nədənsə İnqilab Məmmədovun fiti susdu. Çox şübhəli, daha çox penaltiyə oxşayan bir epizod idi. Lakin baş hakim buna reaksiya vermədi. Başqa hansısa qəliz hadisə baş vermədi. Amma doğrudan da, həmin epizod mübahisələrə səbəb ola bilər. Böyük ehtimalla hakimin qiyməti buna görə aşağı olacaq.

RƏŞAD ƏHMƏDOV, Zirə - Qəbələ

Oyunun gərgin mübarizə şəraitində keçəcəyi çoxlarına bəlli idi. Amma Rəşad Əhmədov bu ağırlığın öhdəsindən gələ bildi. Baş məşqçilərin idarəçiliyə müəyyən etirazı olsa da, referinin qərarları düzgün idi. Ədalət təmsilçisi epziodlara yaxın olduğundan, demək olar, səhvə yol vermədi. Yalnız Rasim Ramaldanova göstərilən sarı vərəqə sərt qərar oldu. Quruca xəbərdarlıqla kifayətlənmək mümkün idi.

KAMAL UMUDLU, Sumqayıt - Neftçi

Görüş çox gərgin keçdi. Buna hakimin səbəb olduğunu deyə bilərik. Çünki Kamal Umudlu 19-cu dəqiqədə Camaləddin Xocaniyazova birbaşa qırmızı vərəqə göstərdi ki, bu da azarkeşlərin qəzəbinə səbəb oldu. Lakin epizodun təkrarına baxanda deyə bilərik ki, qərar doğru idi. “Sumqayıt”ın baş məşqçisi Aleksey Baqa da bu nüansı qabartmadı. O, mətbuat konfransında referinin idarəçiliyindən narazı olmadığını dilə gətirdi. Sadəcə, həm zədələrə, həm də azarkeşlərin etirazına görə ikinci hissədə müəyyən qədər fasilə yaranmışdı. Lakin Kamal Umudlu oyunun əsas vaxtına 3 dəqiqə əlavə etməklə kifayətləndi. Halbuki ən azı 5 dəqiqə artırmaq olardı.

RAUF CABBAROV, Qarabağ - Sabah

Gərgin mübarizə şəraitində keçəcəyi öncədən də təxmin olunan matçın idarəçiliyi Rauf Cabbarova tapşırılmışdı. Hakim tempi aşağı salmamaq üçün ancaq kobudluğa yer veriləndə fit çalır, əsasən oynamağa icazə verirdi. Epizodlara yaxın olduğundan futbolçular referinin qərarına etiraz etmirdi. Hakim daha çox şifahi xəbardarlıqla kifayətlənirdi. Ancaq kobud qayda pozuntularını tənzimləmək üçün əlini cibinə atırdı.

İLKİN SULTANLI