Milli komandalar üçün ayrılanş fasilə başa çatdı.

Həftəsonu premyer-liqa qaldığı yerdən davam etdi. 4 görüşdə bir-birindən maraqlı nəticələr qeydə alındı. Ötən həftə hakimliklə bağlı da problemlər yaşandı. Daha çox qüsur isə “Neftçi” - “Zirə” matçında qeydə alındı. Ümumiyyətlə, hakimlər tur ərzində əllərini ciblərinə 27 dəfə saldılar. Vərəqələrdən 22-nin rəngi sarı, 5-nin rəngi qırmızı oldu. Turun ən centlmen komandası “Sabah”dı. “Bayquşlar”ın heç bir futbolçusu cəzalanmadı. Həftənin ən kobud klubu isə “Zirə” oldu. İnqilab Məmmədov “qartallar”ın üzvlərinə 12 vərəqə göstərdi. Bunlardan 10-nun rəngi sarı, 2-si qırmızı oldu. Reportyorlarımızın qeydlərinə keçid alaq.

Qarabağ - Səbail, RƏŞAD ƏHMƏDOV
Matçın sürəti və tempi o qədər də yüksək deyildi. Buna görə də oyunu idarə etmək Rəşad Əhmədov üçün çətin olmadı. Sərt oyunun şahidi olmadığımızdan referi əlini cibinə az apardı. Penalti epizodu zamanı da tam yerində, düzgün qərar verdi. Hər iki tərəfin narazı qalacağı heç bir qərara rast gəlmədik.

Sumqayıt - Sabah, KAMAL UMUDLU
Görüş qonaqların aşkar üstünlüyü şəraitində keçdi. Demək olar ki, mübahisə doğuran epizodlar baş vermədi. “Tələbələr”in aşkar üstün olduğu matçda hakimin üzərinə o qədər də yük düşmədi. Kamal Umudlu hadisələrin mərkəzində olurdu. Onun köməkçiləriylə anlaşması da qaydasında idi. Xırda metodik səhvləri nəzərə almasaq, hakimlər briqadasının işini qənaətbəxş saymaq olar.

Qəbələ - Keşlə, FƏRİD HACIYEV
Oyun gözlənilənin əksinə gərgin keçdiyindən hakim də diqqətli davranmaq məcburiyyətində idi. Fərid Hacıyev və köməkçiləri böyük ölçüdə bunun öhdəsindən gəlməyi bacardı. Qarşılaşma ərzində hər iki tərəf etirazlar etsə də, referinin qərarları və göstərdiyi vərəqələr yerində idi.

Neftçi - Zirə, İNQİLAB MƏMMƏDOV
“Referi bu görüşün öhdəsindən gələ bilmədi” deyə bilərik. İnqilab Məmmədov matçdakı səhvləri ilə doğrularının üstündən xətt çəkdi. İlk hissəni o qədər də pis idarə etmədi. İkinci yarıda Coşqun Diniyevə göstərdiyi qırmızı vərəqədən sonra əli-ayağı dolaşdı. Bu epizodda haqlı idi. Diniyev kobudluğa əl atmışdı. Bu səbəbdən də qırmızı vərəqə ilə cəzalanmalıydı. Lakin Rəşad Sadıqovun etirazı Məmmədovu təşvişə saldı. Bu səbəbdən də qorxuya düşüb 73-cü dəqiqədə meydanın kənarında bir-birinə girən Təmkin Xəlilzadə ilə Azər Əliyevə qırmızı vərəqə göstərmədi. Eddi İsrafilovun meydandan qovulması da şübhəli məqamdı. Həmin epizodda hakim qırmızı vərəqə göstərməyə də bilərdi. Lakin Sadıqovun basqısından qurtulmaq istəyən Məmmədov qaş düzəltmək yerinə göz çıxardı. Ağabala Ramazanova göstərilən “qırmızı”, Anar Nəzirovla Sərtan Taşkına verilən “sarı” isə fiasko idi. Həmin epizodları futbolçulara keçmək olardı. İnqilab Məmmədovu oyuna yox, son dəqiqədə özündə cəsarət tapıb, penalti təyin etdiyinə görə alqışlamaq olar. Çünki həqiqətən də qaydalara görə qərar doğru idi. Mehdi Cənnətov Emin Mahmudov topa zərbə endirəndən sonra olsa belə, sərt toxunuş edibsə, bu penaltidi. Düşünmək olar ki, Frits Stuxlik bu görüşdəki idarəçiliyinə görə İnqilaba bir neçə oyunluq istirahət verəcək.