"Ayaks" Avropa Liqasının 3-cü turunda keçirilən matçda "Qarabağ"ı Bakıda böyük hesabla məğlub etdi - 3:0.

"Football-plus.az" xəbər verir ki, qonaqların baş məşqçisi Françesko Farioli oyunsonrası mətbuat konfransında jurnalistlərin suallarını cavablayıb.

- Nəticədən məmnun qaldım. Əvvəldən rahat olmayacağını bilirdik. Oyunçuların performansı yaxşıdı. Konkret addım atmaq lazımdı. Daha yaxşı nəticələr qazanmaq istəyirik.

- "Ayaks" həmişə avrokuboklarda mübarizə aparıb. Hakim haqda fikirləriniz necədi? Niderland çempionatında da belə penalti və ya qırmızı vərəqələr verilirmi?
- Biz hakimlərlə bağlı danışa bilmərik. Çox üzr istəyirəm, amma münasibət bildirməyəcəm.

- İlk hissədə komandanın performansından nə dərəcədə razı qaldız? Biz fərqli "Ayaks" gözləyirdik.
- İlk dəqiqələrdə "Qarabağ" təqdirəlayiq oynadı. Fantastik çıxış etdilər. Xatırlayırsızsa, dünən rəqibin güclü olduğunu demişdik. Sadəcə, qırmızı vərəqədən sonra hadisələrin axarı dəyişdi.

- Sizcə, qələbənin əsas səbəbi nə oldu?
- Bu, sadəcə, bir elementlə bağlı deyil. Bir çox məqamların cəmi sayəsində qalib gəldik. Qırmızı vərəqədən sonra daha rahat oynadıq. Müəyyən dəyişikliklər oldu və bundan faydalanmağa çalışdıq. Onu deyə bilərəm ki, "Qarabağ" çox yaxşı müqavimət göstərdi və mübarizənin gərgin davam etməsi üçün əlindən gələni etdi.

- "Ayaks"ın əvvəlki qədər güclü olmadığı hər kəsə bəllidi. 9 nəfərlə qalan "Qarabağ"a qarşı da yaxşı oyun sərgiləyə bilmədiz. Növbəti rəqiblər "Qarabağ"dan daha güclü olacaq. Bu oyunla onlara qarşı necə mübarizə aparacaqsız?
- Oyunumuzu təkmilləşdirməyə çalışacağıq. Hələ mövsümün əvvəlidi. "Ayaks"ın inkişafı davam edir. Növbəti oyunlarda daha yaxşı oyun göstərməyə çalışacağıq. Avropa Liqasının yeni formatında hər qol, hər xal çox vacibdi. Bu gün qalib gəldiyimizə görə xoşbəxtik. Azarkeşlər üçün daha yaxşısını etməyə çalışacağıq.

KƏNAN BAHADIR