"Ayaks" sabah Avropa Liqasının əsas mərhələsinin 3-cü turunda "Qarabağ"ın qonağı olacaq.

"Football-plus.az" xəbər verir ki, Amsterdam təmsilçisinin baş məşqçisi Françesko Farioli matçdan əvvəl keçirilən mətbuat konfransında iştirak edib və jurnalistlərin suallarını cavablayıb.

- "Qarabağ"la oyunda hər şey başa verə bilər. Məğlub olmağınız da mümkündü. Mental baxımdan bunu hazırsızmı?
- Təbii ki, siz haqlısız. Futbol dəyişikliklərin və gözlənilməz hadisələrin məcmusudu. Biz burda emosiyaları kənara qoymalıyıq. Məğlub olsaq, bunu dərhal unudub növbəti matça hazırlaşmağa başlamalıyıq. Futbolda belə halların baş verməsi mümkündü.

- Niderlanddan Azərbaycana gəlmək bahalı prosesdi. Bakıya xeyli tərəfdarla gəlmisiz. Bu haqda nə deyə bilərsiz?
- Bəli, azarkeşlərimiz işdən icazə alıb, ailələriylə sağollaşıb və bura gəliblər. Bu həm maddi, həm də mənəvi cəhətdən böyüş işdi. Çalışacağıq ki, onların fədakarlığını qiymətləndirək və qələbə qazanaraq hamısını sevindirək.

- Cordan Hendersonun "Ayaks"dan ayrılacağı haqda xəbərlər yayılıb. Bu haqda nə deyə bilərsiz?
- Həmin xəbərlər həqiqəti əks etdirmir. O bizim kapitanımızdı və "Ayaks"dadı. Bazübəndi daşıyan futbolçu kimi çiyinləri üzərində böyük məsuliyyət var. Henderson bunu dərk edir.

- Sabah rəsmi geyimdə olacaqsız, yoxsa dəbilqə?
- Baş məşqçi kimi işimizi dərk edirik. Hər an hər şeyə hazır olmalıyıq. "Qarabağ"ın çox güclü komanda olduğunu bilirik. Buna görə dəbilqə geyəcəm (gülür).

- Niderland premyer-liqasında əhəmiyyətli oyunlar sizi gözləyir. "Qarabağ"la matçda qazanılacaq nəticə həmin görüşlərə necə təsir edəcək?
- Bəli, çempionatdakı matçlar bizim üçün çox vacibdi. Bütün oyunlarda qələbə qazanmaq istəyirik. Lakin indi bu haqda düşünmürük. Məhz "Qarabağ"la oyuna köklənmişik. Amma bu o demək deyil ki, liqa bizim üçün önəmli deyil. Sabah qələbə qazanıb liqa oyunlarında daha inamlı və motivasiyalı olmaq istəyirik.

- Brayan Brobbi məşqdə çox həvəsli görünürdü. Sabah onu start heyətində görə bilərik?
- Futbolçularımın işə yanaşma tərzindən xəbərdaram. Hər birinin nəyə qadir olduğunu bilirəm. Amma bəzən onlar haqda olan bütün fikirlərimizi açıqlamırıq. Özlərinə də demirik. Hücumçularımızın performansı bizim üçün çox vacibdi. İnanıram ki, start heyətində yer alacaq bütün futbolçular yaxşı nəticə üçün əlindən gələni edəcək.

- "Ayaks" səfərdə meydana çıxacaq. Bu, "Qarabağ"ın yaxşı nəticə qazanmasına yardımçı ola bilərmi?
- Təbii ki, bu, çox ciddi amildi. "Qarabağ" qalibiyyətləri çox olan komandadı. Azarkeş kütləsi də çox genişdi. Bütün bunları nəzərə almışıq və planlarımızı qurmuşuq.

- İki gündü ki, Bakıdasız. Paytaxtımızla bağlı ilkin təəssüratlarınız necədi? "Neftçi Arena"da məşq etdiz. İnfrastrukturun səviyyəsi yaxşıdımı?
- Həm şəhər, həm də ölkə haqda təəssüratlarım müsbətdi. Türkiyədə işlədiyim dövrdə türkləri yaxından tanımışdım. Azərbaycanlılar onlarla eyni xüsusiyyətlərə malikdi. Burda hər şey əladı.

KƏNAN BAHADIR