"Ayaks" sabah Avropa Liqasının əsas mərhələsinin 3-cü turunda "Qarabağ"ın qonağı olacaq.

"Football-plus.az" xəbər verir ki, Amsterdam təmsilçisinin futbolçusu Daniel Ruqani matçdan əvvəl keçirilən mətbuat konfransında jurnalistlərin suallarını cavablayıb.

- "Qarabağ"ın oyunlarını diqqətlə izləmişik, ciddi təhlil etmişik. Rəqibin nə qədər güclü olduğunu bilirik. Təhlükəli komandadı. Uzun illərdi ki, avrokuboklarda çıxış edir və zəngin təcrübəyə malikdi. Əlimizdən gələni edəcəyik ki, evə qələbəylə dönək. Nə etməli olduğumuzu bilirik.

- Sabah əvvəldən sona qədər oynamağa hazırsanmı?
- Komanda olaraq sona qədər mübarizə aparıb rəqibimizi məğlub etməyə çalışacağıq. Meydana çıxmaq, oynamaq mənim üçün xoşbəxtlikdi. Ümid edirəm ki, komanda yoldaşlarıma kömək edə biləcəm və istədiyimiz nəticəni qazanacağıq.

- Deyəsən, dünən hava limanında problemlə rastlaşmısız və saatlarla vaxt itirmisiz...
- Bəli, təəssüf ki, elektron vizayla bağlı çatışmazlıqla üzləşdim. Viza səhv doldurulmuşdu. Bu üzdən, Bakıdakı hava limanında üç saat qalmalı oldum. Hər halda, problem həll edildi. İndi yalnız sabahkı oyun haqda düşünürəm.

KƏNAN BAHADIR