“Qarabağ”ın Avropa Liqasının 3-cü turunda “Ayaks”ı qəbul edəcəyi matçın baş hakimi Nikolas Uolşdu.

“Football-plus.az” ədalət təmsilçisi haqda ətraflı məlumatı təqdim edir.

33 yaşlı hakim 2013-cü ildən Şotlandiya premyer-liqasının oyunlarını idarə edir. O, yerli çempionatda meydana çıxdığı 146 görüşdə 580 sarı, 28 qırmızı vərəqə göstərib. Ölkəsinin tanınmış ədalət təmsilçisi olan Nikolas aşağı liqalarda və kubok qarşılaşmalarında da baş hakim kimi fəaliyyət göstərir. 2018-ci ildə FİFA referisi statusu qazanıb və indiyə qədər avrokuboklarda, həmçinin 17 və 21 yaşadək futbolçuların Avropa çempionatının seçmə mərhələ oyunlarında ədaləti qoruyub.

Uolş Azərbaycanın futbol ictimaiyyəti üçün yad sima deyil. O, Avropa Liqasının 2019/20 mövsümündə keçirilən “Qəbələ” – “Dinamo” (Gürcüstan) oyununda iş başında olub ki, “qırmızı-qaralar” uduzub – 0:2. Uolşun daha iki təyinatı “Qarabağ”la bağlıdı. Belə ki, o, “köhlən atlar”ın Konfrans Liqasının 2022/23 mövsümünün pley-off mərhələsində “Gent”in qonağı olduğu matçda ədaləti təmsil edib. Həmin görüş belçikalıların penalti seriyasında qalib gəlməsiylə nəticələnib (5:3). Həmçinin şotlandiyalı Avropa Liqasının 2023/24 mövsümünün qrup mərhələsində - “Qarabağ” – “Molde” matçında VAR otağında əyləşib. Bu oyunda ağdamlılar qələbə qazanıb – 1:0.

Ümumiyyətlə, referi indiyə qədər 386 qarşılaşma idarə edib, 1522 sarı, 97 qırmızı vərəqə göstərib.

KƏNAN BAHADIR