''Qalatasaray'' bu gün Avropa Liqasının əsas mərhələsinin 3-cü turunda İsveç təmsilçisi ''Elfsborq''u qəbul edəcək.

Oyun yerli vaxtla saat 17.30-da, yəni bizim vaxtla 18.30-da başlayacaq. Matçın avrokuboklar üçün erkən saatda başlaması diqqət çəkir. Amma bu, səbəbsiz deyil.

Bilindiyi kimi, bu gün həm də Çempionlar Liqasının oyunları var. UEFA bu üzdən dünya səviyyəsində izləyici sayını artırmaq üçün bu mövsüm AL-in ən populyar klublarından olan ''Cim-Bom''un matçını erkən saatlara salmaq qərarına gəlib. Bu, 2011-in yanvarında istifadə verilən ''Rams Park'' stadionunda ən erkən saatda keçiriləcək ikinci avrokubok matçı olacaq.

2013-ün dekabrın 10-da İstanbul nəhəngi ÇL-in qrup mərhələsində ''Yuventus''la oyuna çıxmışdı. Həmin vaxt məlum olduğu kimi güclü qar üzündən oyun ertəsi günə keçirilmişdi.

Dekabrın 11-də isə qarşılaşma yerli vaxtla saat 15.00-da başlamışdı. Ümumiyyətlə, Türkiyə çempionatında da ''Rams Park''da oyunlar adətən axşam saatlarında keçirilir. Bu mövsüm ilk dəfə bu arenada bir oyun gündüz saatlarında başlayacaq.

ƏLİ