Bu gün superliqanın 9-cu turu çərçivəsində “Qalatasaray” ilə “Beşiktaş” arasında böyük səbirsizliklə gözlənilən derbi baş tutacaq.

"Football-plus.az" xəbər verir ki, oyun “Qalatasaray”ın meydanında, yəni “Rams Park”da keçiriləcək. Maraqlıdı ki, derbi eyni zamanda “Cim-Bom”un bu stadionda keçirəcəyi 300-cü rəsmi qarşılaşma kimi tarixə düşəcək!

52280 yerlik bu stadion 2011-ci il yanvarın 15-də “Ayaks”a qarşı yoldaşlıq matçı ilə rəsmən istifadəyə verilmişdi. Stadion 2011-21-ci illərdə “Türk Telekom”, son iki mövsümdə isə “Nef Stadionu” adlanırdı. Bu yay “Rams Qlobal” şirkəti ilə imzalanan sponsorluq müqaviləsindən sonra arena “Rams Park” adlanmağa başladı. “Qalatasaray” indiyə qədər bu stadionda keçirdiyi 299 rəsmi oyundan 193 qələbə, 61 heç-heçə və 45 məğlubiyyət ilə ayrılıb (top fərqi – 629:293). Bu 299 oyundan 224-ü superliqa, 42-si ölkə kuboku, 25-i ÇL və 8-i AL çərçivəsində baş tutub.

Konkret Türkiyə çempionatı çərçivəsində isə İstanbul nəhəngi bu stadiondan 155 qələbə, 41 heç-heçə və 28 məğlubiyyətlə ayrılıb (top fərqi – 485:203). “Atatürk Olimpiya”dan sonra Türkiyənin ən çox azarkeş tutumuna malik 2-ci staionu olan “Rams Park”da “Qalatasaray”ın ilk qolunu hazırda “Sivasspor”u çalışdıran Sərvət Çətin vurub. “Sarı-qırmızılar”ın burdakı ən böyük hesablı qələbəsi 7:0, ən böyükhesablı məğlubiyyəti isə 1:6-dı. 7:0-lıq qələbə ötən mövsüm Türkiyə kubokunun 3-cü mərhələsində 3-cü divizion təmsilçisi “Kastamonuspor”la oyunda qeydə alınıb. 1:6-lıq məğlubiyyət isə bir çox fanatın xatırladığı kimi, 2013/14-də ÇL-in qrup mərhələsində “Real” ilə oyunda qeydə alınıb. Həmin oyunda Kriştiano Ronaldo het-trik etmiş, o mövsümün sonunda Madrid nəhəngi ÇL-in qalibi olmuşdu.

Qarşıdan “Beşiktaş”la oyun gəldiyi üçün “Qalatasaray”ın bu stadionda bu rəqibə qarşı keçirdiyi oyunların statistikasına da nəzər salmaq maraqlı olar. “Cim-Bom” bu arenada “Qartal”a qarşı 14-cü oyununa çıxacaq. Hamısı superliqaya təsadüf edən əvvəlki 13 qarşılaşmada qələbə nisbəti, təbii ki, meydan sahiblərinin xeyrinədi – 9:2. Daha 2 görüşdə bərabərlik qeydə alınıb. “Ağ-qaralar”ın qələbələri 2015/16 və 2016/17 mövsümlərinə (hər iki halda 1:0) təsadüf edib. 2017-nin fevralında Anderson Talişkanın qolu ilə əldə olunan qələbədən bəri “Beşiktaş” bu stadionda “Qalatasaray”a qarşı keçirdiyi 6 oyundan 5 məğlubiyyət, 1 heç-heçə ilə ayrılıb. Yeri gəlmişkən, Okan Buruklu “Qalatasaray”ı rəsmi oyunlarda məğlub edən son kollektiv məhz elə “Beşiktaş”dı!

Aprelin 30-da, yəni ötən mövsümün 32-ci turunda “Qartal” öz meydanında 3:1 hesabı ilə üstün olmuşdu. Həmin vaxtdan bu yana “Qalatasaray” 14-ü superliqada, 6-sı ÇL-in təsnifat və 2-si ÇL-in qrup mərhələsində olmaqla keçirdiyi 22 qarşılaşmadan 19 qələbə, 3 bərabərliklə ayrılıb!