Qrupun favoritləri olan İtaliya və Fransa yığmaları 4-cü turun oyunlarında statusunu doğrultdular. Favoritlər qalib gəlməklə Millətlər Liqasının (ML) pley-offuna vəsiqə qazanmaq şansını bir qədər də artırdılar.

Luçano Spalletti oktyabrın 10-da Romada Belçika ilə keçirilən oyunla (2:2) müqayisədə start heyətində bir neçə dəyişiklik etmişdi: təcrübəli mütəxəssis İsrailə qarşı matçda qapıda Vikarioya, yarımmüdafiədə Facoliyə, hücumda isə Raspadoriyə ilk dəqiqələrdən oynamaq şansı vermişdi. “Skuadra adzurra”nın yeganə itkisi isə belçikalılarla oyunda qırmızı vərəqə alan Pelleqrini idi. Spallettinin həmkarı Ran Ben Şimon Fransa ilə əvvəlki oyunla (1:4) müqayisədə orta xətdə Kanxovskini, hücumda isə Madmon ilə Peretsə start heyətində şans vermişdi.

İtaliya ilk dövrədə neytral meydanda 2:1 hesabıyla qalib gəldiyi israilliləri bu dəfə böyük hesabla məğlub etdi. Maraqlıdı ki, Udinedə keçirilən matçın 1-ci hissəsində topa daha çox ev sahibləri nəzarət etsələr də, ilk real qol vəziyyətlərini qonaqlar yaratdılar: Qluxun zərbəsi azca qeyri-dəqiq alındı. Amma bundan sonra Qlazerin qoruduğu qapının qarşısında təhlükələr sıralanmağa başladı. İsrailli qapıçı Retegi ilə Tonalinin zərbələrinin qarşısını aldı, Dimarko ilə Retegi isə əlverişli şansları boşa verdilər. Amma fasilə ərəfəsində Perets cərimə meydançasında Tonaliyə qarşı kobud oynadı və Retegi penalti ilə hesabı açdı. Spallettinin komandası fasilədən sonra yaxaladığı imkanlardan daha effektli şəkildə istifadə etdi. İkinci hissədə 3:1 hesablı üstünlük əldə edən İtaliya yığması inamlı qələbə ilə liderliyini davam etdirdi.

Qrupun digər matçına maraq daha böyük idi. ML-in qrup mərhələsinə İtaliyaya məlubiyyətlə (1:3) başlayan Fransa yığması Belçikanı evdə 2:0 hesabı ilə məğlub edəndən sonra İsrailə də qalib gəlmişdi (3:1). Didye Deşamın komandası uğurlu oyunlar seriyasını Brüsseldə də davam etdirdi. Hərçənd ilk hissədə Belçika daha yaxşı təsir bağışladı. Domeniko Tedeskonun komandası hissənin ortalarına qədər güclü pressinq tətbiq etməklə oyun planında böyük üstünlüyə malik oldu. Lakin qol imkanlarından istifadə edə bilmədi. Belə oyunun məntiqi nəticəsində meydan sahibləri penalti vurmaq hüququ da qazandılar. Amma Tilemans topu qapının üstündən tribunalara göndərdi. Bu epizoddan sonra fransızlar tədricən üstünlüyü ələ alaraq real qol imkanı qazandılar. Kolo Muani Tilemansdan fərqli olaraq penaltini dəqiq yerinə yetirdi. Hesabda geri düşməsinə baxmayaraq, dərhal irəli atılan belçikalılar Openda ilə cavab qolunu vurdular.

Fasilədən sonrakı mübarizə qarşılıqlı hücumlarla yadda qaldı və Kolo Muani 62-ci dəqiqədə qonaqları önə keçirdi. 14 dəqiqə sonra Çuameninin növbəti xəbərdarlığa görə Fransanı meydanda on nəfərlə qoyması belçikalılar üçün əlverişli imkan demək idi. Lakin bir neçə gün əvvəl İtaliya ilə matçda rəqibin azlıqda qalmasından sonra məğlubiyyətdən qaçan Tedeskonun komandası bu dəfə eyni vəziyyətdən yararlana bilmədi. Fransa müdafiədə yaxşı oynamaqla “qırmızı iblislər”i yenə məğlub etdi. Vacib qələbə Deşamın komandasına İtaliya ilə liderlik uğrunda mübarizəni davam etdirmək imkanı verdi. Belçika isə çox güclü qrupda 4 xalla 3-cü yerdə qaldı.

A liqası, 2-ci qrup
İtaliya - İsrail 4:1 (1:0)
İtaliya: Vikario, Kambyaso, Di Lorentso, Bastoni, Kalafyori, Dimarko (Udoci, 73), Frattezi (Buoncorno, 86), Tonali, Facoli (Riççi, 46), Raspadori (Maldini, 73), Retegi (Lukka, 84).
İsrail: Qlazer, Feynqold, Naxmias, Baltaksa, Abada (Baribo, 75), Kanixovski (Caber, 46), Abu Fani, Aziza (Qropper, 64), Perets (Safuri, 80), Qlux, Madmon (Xalayli, 64).
Qollar: Retegi, 41-p. (1:0). Di Lorentso, 54 (2:0). Abu Fani, 66 (2:1). Frattezi, 72 (3:1). Di Lorentso, 79 (4:1).
Vərəqə: Kambyaso, 66 - sarı.
Hakim: Rikardo De Burqos Benqoeçea (İspaniya).
14 oktyabr. Udine. 11700 tamaşaçı.

Belçika - Fransa 1:2 (1:1)
Belçika: Kastels, Fas, Debast, Teate, Kastan (De Kuyper, 67), Manqalya (Vranks, 67), Tilemans (Lükebakio, 78), De Ketelare (Engels, 81), Dokyu, Trossar, Openda.
Fransa: Menyan, Kunde, Konate, Saliba, Din, Çuameni, Kone, Genduzi (Kamavinqa, 73), Dembele (Fofana, 79), Kolo Muani (Türam, 90+3), Barkola (Nkunku, 73).
Qollar: Kolo Muani, 35-p. (0:1). Openda, 45+3 (1:1). Kolo Muani, 62 (1:2).
Tilemans 23-cü dəqiqədə penaltidən yararlana bilməyib (üst).
Vərəqələr: Din, 7. Saliba, 22. Çuameni, 24. Manqalya, 29. Konate, 45. Fas, 53. De Ketelare, 56. Menyan, 79 - sarı. Çuameni, 76 – qırmızı (ikinci sarı).
Hakim: İrfan Pelto (Bosniya və Hersoqovina).
14 oktyabr. Brüssel. 39731 tamaşaçı.

1. İtaliya 4 3 1 0 11-5 10
2. Fransa 4 3 0 1 9-5 9
3. Belçika 4 1 1 2 6-7 4
4. İsrail 4 0 0 4 4-13 0

14 noyabr: Belçika – İtaliya, Fransa - İsrail.

Faktlar
* Daniel Maldini İtaliya yığmasında debüt etdi. “Montsa”nın 23 yaşlı yarımmüdafiəçisi atası Paolonun milli formada keçirdiyi son oyundan 22 il 118 gün, babası Çezarenin sonuncu beynəlxalq matçından 61 il sonra “skuadra adzurra”da ilk dəfə meydana çıxdı. Bununla da Maldinilər milli komandada üç nəslin nümayəndəsi ilə təmsil olunan ilk sülalə oldu.
* Didye Deşam Fransa yığması ilə 163-cü sınağını verdi. O, bu planda dünya futbolunda almaniyalı Zepp Herbergeri arxada qoyaraq 4-cü yerə çıxdı. Milli komandanı daha çox oyuna çıxaran məşqçilər isə uruqvaylı Oskar Tabares (224), almaniyalı Yoahim Löv (198) və danimarkalı Morten Olsendi (166).

Oyundan sonra
Luçano Spalletti, İtaliya yığmasının baş məşqçisi: