Oktyabrın 10-da Millətlər Liqasının (ML) qrup mərhələsinin 3-cü turuna start verildi.

Turnirin 4-cü mövsümünün ilk iki oyununda maksimum nəticə göstərən İtaliya, İngiltərə və Yunanıstan yığmalarından ikisi büdrədi. İngiltərənin evdə Yunanıstana uduzması daha böyük ajiotaj doğurdu.

Almaniyada bu yay keçirilən qitə çempionatında mübarizəni 1/8 finalda dayandıran İtaliya yığması yeni tsiklə uğurla başlamışdı. Sentyabrın 6-da Parisdə Fransanı 3:1 hesabı ilə məğlub edən “skuadra adzurra” bir neçə gündən sonra İsrailə də qalib gəlmişdi (2:1). Amma Luçano Spallettinin komandası qrupda qələbə seriyasını davam etdirə bilmədi.

Halbuki Belçika ilə ev oyununun əvvəli böyük ölçüdə apenninlilərin rahatca 3-cü qələbəsini qazanacağından xəbər verirdi. Qonaqlar müxtəlif səbəblərdən iki hücumameyilli oyunçudan – yarımmüdafiəçi De Bruyne ilə hücumçu Lukakudan yararlana bilmədilər. Luçano Spallettinin komandası start fiti səslənən kimi hücuma atıldı və bir neçə saniyədən sonra hesabı açdı. Dimarkonun zərbə mövqeyinə çıxardığı Kambyaso ikinci cəhddə italyanları önə keçirdi.

Bununla kifayətlənməyən ev sahibləri hücumlara ara vermədilər və bunun bəhrəsini 24-cü dəqiqədə Reteginin qolu ilə gördülər. Spallettinin komandasının 3-cü qolu vurmaqla belçikalların aqibətini ilk hissədəcə müəyyən etmək istədiyi aydın görünürdü. Lakin Pelleqrini işləri korladı: “Roma”nın yarımmüdafiəçisi rəqibə qarşı kobud “sürüşmə” fəndinə əl atdığı üçün qırmızı vərəqə ilə cəzalandı. Rəqib meydanda azlıqda qalan italyanları dərhal cəzalandırdı: De Kuyper Trossarın ötürməsi ilə fərqi azaltdı.

Fasilədən sonra İtaliya yığmasının siması dəyişdi: apenninlilər diqqəti daha çox müdafiəyə və əks-hücuma ayırmağa başladılar ki, bunu gözləməyə dəyərdi. Amma onlar rəqibin getdikcə artan təzyiqi qarşısında tab gətirə bilmədilər: həmin Trossar birsaatlıq mübarizənin sonunda hesaba tarazlıq gətirdi. Domeniko Tedeskonun komandası qalan vaxtda oyun planında böyüküstünlüyə malik olsa da, sıx müdafiə olunan İtaliyanın qapısına bir daha yol tapa bilmədi. İstənilən halda Belçika yığmasının Romada əzmkarlıq göstərdiyini qeyd etməliyik. “Skuadra adzurra” isə iki xal itkisinə baxmayaraq, 1-ci yerdə qaldı.

Qrupun digər matçında gözlənilən nəticə qeydə alındı. ML-in qrup mərhələsinə İtaliyaya məlubiyyətlə başlayan Fransa Belçikanı evdə 2:0 hesabı ilə məğlub edəndən sonra səfərdə İsrailə də qalib gəldi. Hərçənd yəhudilərlə oyun İsraildəki müharibə vəziyyətinə görə neytral meydanda keçirildi.

Budapeştdəki matça nominal qonaqlar fəal başladılar və 7-ci dəqiqədə Kamavinqa hesabı açdı. Amma buna görə “sınmayan” israillilər çox keçmədən Qandelman ilə cavab qolunu vurdular. Lakin asiyalıların sevinci çox çəkmədi və matçın qalan hissəsində meydanda, demək olar ki, intriqa yaşanmadı. Tezliklə Nkunku fransızları önə keçirdi. Fasilədən sonra 1:2 hesabı uzun müddət dəyişmədi. Amma meydana sonradan çıxan iki futbolçu – Genduzi ilə Barkola Fransanın böyükhesablı qələbəsini təmin etdilər. Didye Deşamın komandası İtaliyaya uduzduğu üçün 2-ci yerdə qaldı. Ran Ben Şimonun çalışdırdığı İsrail isə çox güclü qrupda üçüncü məğlubiyyətini alaraq sonuncu yerdə daha da “möhkəmləndi”.

Qrup mərhələsi, 3-cü tur
A liqası, 2-ci qrup
İtaliya - Belçika 2:2 (2:1)
İtaliya: Donnarumma, Kambyaso, Di Lorentso, Bastoni, Kalafyori, Dimarko (Udoci, 70), Frattezi (Bellanova, 90), Riççi (Facoli, 70), Tonali (Pizilli, 80), Pelleqrini, Retegi (Raspadori, 80).
Belçika: Kastels, Fas, Debast, Teate (Vranks, 69), Manqalya (Kastan, 68), De Kuyper, Tilemans, Dokyu (Fofana, 87), De Ketelare (Lükebakio, 68), Trossar, Openda (Nqonq, 87).
Qollar: Kambyaso, 1 (1:0). Retegi, 24 (2:0). De Kuyper, 42 (2:1). Trossar, 61 (2:2).
Vərəqələr: Trossar, 65. Donnarumma, 90. Pizilli, 90+5 - sarı. Pelleqrini, 40 – qırmızı.
Hakim: Espen Eskos (Norveç).
10 oktyabr. Roma. 44297 tamaşaçı.

İsrail - Fransa 1:4 (1:2)
İsrail: Qlazer, Feynqold, Naxmias, Baltaksa, Abada, Caber (Qropper, 76), Abu Fani (Azulay, 67), Aziza (Biton, 76), Qandelman (Perets, 62), Qlux, Baribo (Xalayli, 62).
Fransa: Menyan, Kunde, Konate, Saliba, T.Ernandes (Din, 90), Çuameni (Zair Emeri, 90), Kamavinqa (Fofana, 70), Dembele, Olise (Barkola, 70), Nkunku (Genduzi, 77), Kolo Muani.
Qollar: Kamavinqa, 7 (0:1). Qandelman, 24 (1:1). Nkunku, 28 (1:2). Genduzi, 87 (1:3). Barkola, 89 (1:4).
Vərəqə: Kamavinqa, 18 - sarı.
Hakim: Nikola Dabanoviç (Monteneqro).
10 oktyabr. Budapeşt. 2226 tamaşaçı.

1. İtaliya 3 2 1 0 7-4 7
2. Fransa 3 2 0 1 7-4 7
3. Belçika 3 1 1 1 5-5 4
4. İsrail 3 0 0 3 3-9 0

Növbəti turun oyunları bu gün keçiriləcək: İtaliya – İsrail, Belçika – Fransa.

Faktlar
* Fransa yığması tarixində 400-cü oyununu keçirdi. Yubiley matçında 230-cu qələbəsini qazanan “üçrənglilər” indiyədək 83 dəfə məğlub olub, 87 oyunda isə rəqibləri ilə heç-heçəyə razılaşıblar.
* Didye Deşam Fransa yığması ilə 162-ci sınağını verdi. O, indi bu planda dünya futbolunda almaniyalı Zepp Herberger ilə 4-5-ci yerləri bölüşür. Milli komandanı daha çox oyuna çıxaran məşqçilər isə uruqvaylı Oskar Tabares (224), almaniyalı Yoahim Löv (198) və danimarkalı Morten Olsendi (166).

Oyundan sonra
Luçano Spalletti, İtaliya yığmasının baş məşqçisi: