Çərşənbə axşamı keçirilən oyunlar sırasında əsas diqqət, təbii ki, Londondakı matça yönəlmişdi.

“Football-plus.az” xəbər verir ki, “Uembli”də AÇ-2020-in son finalçıları qarşılaşdı. Sonuncu qitə çempionatının pandemiya səbəbindən 2021-ci ildə məhz bu stadionda keçirilən həlledici matçı İtaliyanın penalti seriyasında İngiltərə üzərində qələbəsi ilə nəticələnmişdi. Futbolun yaradıcıları artıq onları çempionluqdan edən rəqibdən qisasını artıqlamasıyla alıb.

İngiltərə yığması seçmə mərhələdə ilk oyununu martın 23-də İtaliyada keçirmiş və 2:1 hesabıyla qalib gəlmişdi. Qaret Sautqeytin komandası apenninlilərlə növbəti görüşə qədər C qrupunda 5 oyuna 13 xalla liderlik edirdi. Yalnız Ukrayna ilə matçda (1:1) xal itirən adalılar Londonda uduzmayacaqları halda AÇ-2024-ün final mərhələsinə vəsiqə qazanacaqdılar. Seçmə turnirin gedişində baş məşqçisi dəyişən İtaliya isə hər halda evə uğurlu və ya qənaətbəxş nəticə ilə dönməyə çalışacaqdı. Amma bunun qonaqlara asan başa gələcəyini əminliklə demək olmurdu. Meydan amilindən başqa heyət də Luçano Spallettinin komandasının bir qədər əlverişsiz durumda olmasından xəbər verirdi. Səudiyyə Ərəbistanı yığmasına yollanan Roberto Mançininin xələfi ingilislərlə vacib oyunda da itkiləri “sığortalamağa” çalışacaqdı. Kyeza ilə İmmobile zədəli olduqlarına, Tonali ilə Zanyolo isə İtaliyada mərc oyunları ilə bağlı qalmaqalda iştirakına görə ev sahiblərinə qarşı oynaya bilmədilər. İtaliya bu oyunçularsız oktyabrın 14-də Maltanın qapısından 4 cavabsız top keçirmişdi. Amma bir qədər kasad heyət seçmə turnirdə əla görünən İngiltərə qarşısında aciz qaldı.

“Uembli”dəki oyunun əvvəli ev sahiblərinin üstünlüyü ilə keçdi. Qonaq komanda rəqibin ilk dədiqələrdəki təzyiqinə tab gətirməyi bacardı. İtalyanların ilk düşünülmüş hücumu isə qolla nəticələndi: Skamakka Di Lorentsonun ötürməsi ilə hesabı açdı. Meydan sahibləri hesabda geri düşəndən sonra tezliklə özünə gələ bilmədilər. Buna isə İtaliyanın növbəti qolu vurmaq cəhdləri səbəb oldu. Spallettinin komandası bir neçə dəfə Pikfordun qoruduğu qapı qarşısında təhlükəli vəziyyət yaratdı. Amma imkanlardan yararlana bilmədi. Bir qədər arxayınlaşması isə qonaqlara baha başa gəldi: Bellingem komandasına penalti vurmaq hüququ qazandırdı, Keyn isə hesabı bərabərləşdirdi.

İngiltərə fasilədən sonra meydanda diqtə edən komanda oldu. 57-ci dəqiqədə Bellingem ötürmə ilə Reşfordun hesabı 2:1-ə dəyişməsinə şərait yaratdı. 20 dəqiqə sonra isə Keyn rəqib müdafiəsindəki anlaşılmazlıqdan məharətlə yararlanaraq matçda son nöqtəni qoydu. İnamlı qələbə ilə İtaliyadan qisasını artıqlaması ilə alan Sautqeytin komandası gələn il Almaniyada keçiriləcək final turnirinə erkən vəsiqə qazandı. “Skuadra adzurra” isə 2-ci yerdəki mövqeyini itirdi.

Qrupun digər matçı gözlənilən nəticə ilə sona çatdı. Doğrudu, ev sahibi olan Malta yığması Ukrayna ilə oyunun əvvəlində hesabı açmağa müvəffəq oldu. Qrupda bütün oyunlarını uduzan adalılar bir müddət səviyyəcə özlərindən üstün olan rəqibə müqavimət göstərə bildilər. Lakin onların canfəşanlığı yalnız 38-ci dəqiqəyə qədər davam etdi. Həmin anda Kamenzuli topa uğursuz müdaxilə edərək onu öz qapısına yönəltdi. Bundan özünə gələ bilməyən ev sahibləri çox keçmədən qayda pozuntusuna yol verdilər və Dovbik penalti ilə qonaqları önə keçirdi. Sona yaxın Mudrikin qolu Ukraynanın 3:1 hesablı qələbəsini təmin etdi. Sergey Rebrovun komandası əzmkar qələbə ilə xalını 13-ə çatdıraraq qrupda 2-ci yerə yüksəldi. Başqa sözlə, “mavi-sarılar”ın qitə çempionatında iştirak şansı davam edir.

C qrupu
İngiltərə - İtaliya 3:1 (1:1)
İngiltərə: Pikford, Uoker, Stounz (Qehi, 63), Maquayr, Trippyer, Rays, Fillips (Henderson, 70), Reşford, Bellingem (Qriliş, 85), Foden, Keyn.
İtaliya: Donnarumma, Di Lorentso, Skalvini, Açerbi (Bastoni, 63), Udoci (Dimarko, 63), Kristante, Barella, Frattezi, Berardi (Raspadori, 78), Skamakka (Ken, 63), Əl-Şaaravi (Orsolini, 65).
Qollar: Skamakka, 15 (0:1). Keyn, 32-p. (1:1). Reşford, 57 (2:1). Keyn, 77 (3:1).
Vərəqələr: Fillips, 9. Udoci, 10. Di Lorentso, 31. Skalvini, 65 - sarı.
Hakim: Kleman Türpen (Fransa).
17 oktyabr. London. 83194 tamaşaçı.
Malta - Ukrayna 1:3 (1:2)
Malta: Bonello, S.Borq, Pepe, J.Borq, Kamenzuli, Qiyomye, Yankam (Pizani, 86), N.Muskat (Kristensen, 69), Nvoko (Satariano, 68), C.Mbonq (Attard, 78), P.Mbonq (Motebello, 86).
Ukrayna: Trubin, Zinçenko (Pixalyonok, 87), Matviyenko (Svatok, 46), Mikolenko, Zabarnı, Sidorçuk, Karavayev (Zubkov, 76), Mudrik, Sudakov (Nazarina, 67), Dovbik, Vanat (Konoplya, 67).
Qollar: P.Mbonq, 12 (1:0). Kamenzuli, 38-öz qapısına (1:1). Dovbik, 43-p. (1:2). Mudrik, 85 (1:3).
Vərəqələr: Matviyenko, 31. Pizani, 90+3. Zubkov, 90+3 - sarı.
Hakim: Morten Kroq (Danimarka).
17 oktyabr. Ta’Kali. ????? tamaşaçı.
1. İngiltərə 6 5 1 0 19-3 16
2. Ukrayna 7 4 1 2 11-8 13
3. İtaliya 6 3 1 2 11-7 10
4. Şimali Makedoniya 6 2 1 3 7-14 7
5. Malta 7 0 0 7 2-18 0
17 noyabr: İngiltərə - Malta, İtaliya – Şimali Makedoniya.

Oyundan sonra
Qaret Sautqeyt, İngiltərə yığmasının baş məşqçisi: “Qələbəyə görə çox şadam. Yaxşı bilirik ki, ən yaxşı komandalara qarşı oyunlar bizim üçün irəli addım atmaq istədiyimiz sınaqlardı. Fikrimcə, qitə çempionatının seçmə turnirində ən çətin qrupa düşmüşük. Komandamız üzərində təzyiqin olduğunu etiraf edirəm. Biz bu təzyiqi olduğu kimi qəbul etməliyik. Təzyiq ümidlər reallıqdan fərqli olarkən ortaya çıxır. Reallıq isə budu ki, qalib gəlməyi bacaran komandalardan biri olmaq istəyirik”.

Luçano Spalletti, İtaliya yığmasının baş məşqçisi: “Hər iki hissədə topa yaxşı nəzarət etdik və sona qədər mübarizə apardıq. Lakin ingilislərin iki əks-hücumu həm vəziyyəti, həm də hesabı dəyişdi. Komandam verdiyim tapşırıqları yerinə yetirməyə çalışdı. Doğrudu, səhvlərimiz də oldu, amma oyunumuzda müsbət məqamlar da var idi. Fürsətləri dəyərləndirə bilmədik. Müdafiədə səhv edən kimi isə qapımızda top gördük”.