İtaliya Fransaya 1954-cü ili xatırlatdı - ŞƏRH
Almaniyada bu yay keçirilən qitə çempionatında mübarizəni uyğun olaraq yarımfinalda və 1/8 finala dayandıran Fransa və İtaliya yığmalarının oyununa maraq böyük idi. Parisdə keçirilən matçın nəticəsi ev sahibləri üçün uğursuz oldu.
Halbuki oyun “üçrənglilər” üçün əla başlamışdı: hakimin start fiti yenicə səslənmişdi ki, topu Di Lorentsodan alan Barkola cərimə meydançasına daxil olaraq tirin altından tora göndərdi. İtalyanlar belə başlanğıcdan sonra heç də özlərini itirmədilər. Əksinə hücuma atılaraq cavab qolunu vurmağa yaxın oldular. Frattezinin baş zərbəsi tirə dəydi, Retegi isə dönən topu tora sala bilmədi. Tezliklə Donnarumma Mbappenin yaxın məsafədən ikinci qolu vurmasına mane oldu. Apenninlilərin növbəti hücumlarında Tonalinin rolu böyük idi. “Nyukasl”ın yarımmüdafiəçisi 30-cu dəqiqədə Dimarkonu zərbə mövqeyinə çıxardı, o isə qapının uzaq yuxarı küncünü dəqiq nişan aldı.
Luçano Spallettinin fasilədən sonra Pelleqrinini Raspadori ilə əvəzləməsi tez nəticə verdi: “Napoli”nin hücumçusunun başladığı hücumu Retegi davam etdirdi və Frattezi qonaqları önə keçirdi. 74-cü dəqiqədə Raspadori özü hesabı dəyişdi – 1:3.
Qrupun digər matçı isə favoritin inamlı qələbəsi ilə sona çatdı. Qeyd edək ki, Belçika yığması İsraili neytral meydanda qəbul etdi. Bunun səbəbi Belçikanın hakim dairələrinin məlum səbəbdən israillilərlə oyunu təşkil etmək istəməməsi ilə bağlı idi. Yerli futbol qurumunun problemli məsələni UEFA ilə müzakirəsindən sonra matçın Macarıstanın Debretsen şəhərində təşkilinə qərar verilmişdi. “Nadyerdei” stadionunda bağlı qapılar arxasında baş tutan oyunun ilk yarısı bərabər mübarizə şəraitində keçdi və 1:1 hesabıyla bitdi. Lakin fasilədən sonra təşəbbüsü tamamilə ələ alan belçikalılar iki qol vurmaqla qələbə qazandılar. Opendanın penaltidən yararlana bilmədiyini də qeyd edək.
A liqası, 2-ci qrup
1-ci tur
Fransa - İtaliya 1:3 (1:1)
Fransa: Menyan, Kloss (Kunde, 77), Saliba, Konate, T.Ernandes, Fofana (Kone, 58), Kante (Zair-Emeri, 77), Olise (Dembele, 58), Qrizmann (Türam, 77), Barkola, Mbappe.
İtaliya: Donnarumma, Kambyaso, Di Lorentso, Bastoni, Kalafyori (Buoncorno, 71), Dimarko (Breşianini, 81), Tonali, Frattezi (Udoci, 61), Riççi, Pelleqrini (Raspadori, 46), Retegi (Ken, 81).
Qollar: Barkola, 1 (1:0). Dimarko, 30 (1:1). Frattezi, 51 (1:2). Raspadori, 74 (1:3).
Vərəqələr: Retegi, 49. Kone, 60 - sarı.
Hakim: Sandro Şerer (İsveçrə).
6 sentyabr. Paris. 44956 tamaşaçı.
Belçika – İsrail 3:1 (1:1)
Belçika: Kastels, De Kuyper (Debast, 64), Teate, Fas, Kastan, Onana, Tilemans (Engels, 73), Lükebakio (Bakayoko, 81), De Bruyne, Dokyu (Düranvil, 73), Openda (De Ketelare, 64).
İsrail: Cerefi, Yehezkel, Şlomo, Naxmias, Qropper (David, 64), Qandelman, Lavi, Abu Fani (Caber, 68), Qlux (Perets, 64), Solomon (Biton, 80), Xalayli.
Qollar: De Bruyne, 21 (1:0). Kastan, 36-öz qapısına (1:1). Tilemans, 48 (2:1). De Bruyne, 52-p. (3:1).
Openda 56-cı dəqiqədə penaltidən yararlana bilməyib (qapıçı).
Vərəqələr: Abu Fani, 33. De Bruyne, 77 - sarı.
Hakim: Maykl Oliver (İngiltərə).
6 sentyabr. Debretsen. Tamaşaçısız.
2-ci tur
Fransa – Belçika 2:0
Kolo Muani, 29. Dembele, 57.
İsrail – İtaliya 1:2
Əbu-Fani, 90 – Frattezi, 38. Ken, 62.
1. İtaliya 2 2 0 0 5-2 6
2. Fransa 2 1 0 1 3-3 3
3. Belçika 2 1 0 1 3-3 3
3. İsrail 2 0 0 2 2-5 0
Faktlar
* İtaliya səfərdə Fransaya 1954-cü ildən sonra ilk dəfə qalib gəldi. Həmin matç da apenninlilərin 3:1 hesablı qələbəsi ilə nəticələnmişdi.
* İtaliya rəsmi oyunda Rusiya yığmasından sonra səfərdə Fransaya 3 qol vurmaqla qalib gələn ilk komanda oldu. Şimal qonşularımız 1999-cu ildə “Stad de Frans”da keçirilən matçda 3:2 hesablı qələbə qazanmışdı.
* 14-cü saniyədə hesabı açan Barkola 1933-cü ildən sonra Fransa yığmasının tarixinə ən erkən qolun müəllifi kimi düşdü. “Opta Sports”a əsasən, milli komanda həmin ilə qədər üç matçda hesabı ilk dəqiqədə açsa da, qolların konkret hansı saniyələrdə vurulduğu haqda dəqiq məlumat yoxdu. “Stats Foot” isə Barkolanın qolunun yığma tarixində ən erkən olduğunu iddia edir.
* Mbappe milli formada keçirdiyi son 7 oyunda yalnız bir qol vurub. O, bu yay keçirilən Avropa çempionatının Polşa ilə oyununda (1:1) qapıya penalti ilə yol tapmışdı. Ümumiyyətlə, “Real”ın hücumçusu bu il yığmada keçirdiyi 10 oyunda 2 qol vurub.
Oyundan sonra
Didye Deşam, Fransa yığmasının baş məşqçisi:
“Faktlara diqqət yetirmək lazımdı. Biz matça çox yaxşı başladıq, ilk dəqiqələrdən yaxşı işlər gördük, lakin yüksək səviyyəli oyunu matçboyu oynaya bilmədik. Rəqib səhvlərimizi bizə bağışlamadı. Topla oynamaq bacarığımız kifayət qədər yüksəkdi. İtaliya çox yaxşı təşkilatlanmış komanda kimi oynadı və meydanda buraxdığımız boş zonalardan məharətlə yararlandı. Mən həmişə nəticəyə görə məsuliyyət daşımışam, indi də daşıyıram. Düşüncələrimi və gördüklərimi futbolçulara çatdırıram. İndi ən yaxşı formamızdan uzaq olduğumuzu etiraf etməliyəm. İkinci hissədə əksər ikili mübarizələrdən məğlub ayrıldıq. Rəqibi özümüz təhlükəli alətlərlə təchiz etdik. Ümumiyyətlə, rəqibi 90 dəqiqə boyunca pressinq altında saxlamaq çox çətindi. Bunun üçün lazımi resurslara malik deyildik. Açıq futbol oynadıq, amma müdafiə olunmağa gücümüz çatmadı”.
Luçano Spalletti, İtaliya yığmasının baş məşqçisi:
“Oyunçularımız çox erkən buraxılan qola dərhal lazımi reaksiya verdilər. Fikrimcə, bu, matçın vacib anı idi. Onlar belə startdan sonra komandanı gərginlikdən xilas etməyə çalışdılar və istədikləri futbolu sərgiləməyə başladılar. Buna görə futbolçularımıza ikiqat alqış düşür. Əla yaxşının düşməni deyil: daha yaxşı iş görmək üçün imkan həmişə olur. Bizim üçün oyunboyu eyni tempdə oynamaq vacib idi”.
Bredli Barkola, Fransa yığmasının hücumçusu:
“Yığmadakı ilk qoluma görə sevinsəm də, uduzduğumuz üçün məyusam. Biz daha yaxşı oynaya bilərdik. Hər matçda ən yaxşı oyunumu sərgiləməyə çalışıram. Start heyətində meydana çıxıb-çıxmamağımdan asılı olmayaraq, həmişə oynamağa hazıram. Oyundan həzz alıram, məşqlərdə və matçlarda var gücümü sərf edirəm”.
Digər xəbərlər
