''Qalatasaray''da 14-cü mövsümünü keçirən və artıq klubun əfsanəsi hesab olunan Fernando Muslera ilə bağlı sürpriz iddia ortaya atılıb.

Belə ki, təcrübəli uruqvaylı qapıçının mövsümün sonunda Türkiyəni tərk edəcəyi barədə şayiələr yayılıb. 38 yaşlı əlcək sahibinin müqavilə müddəti gələn yay başa çatır. O rəhbərliyin müqaviləni yeniləməklə bağlı təklifini geri çevirib. İddialara görə Musleranın ailəvi problemləri var. Hazırda şərhçi kimi fəaliyyət göstərən Tuqay Kərimoğlunun sözlərinə görə Musleranın ailə üzvlərindən birinin səhhəti ilə bağlı ciddi problem yaranıb. Ona görə də Muslera mövsüm bitən kimi İstanbulu tərk edəcək.

Bəzi mənbələrin iddiasına görə ''Qalatasaray'' artıq qapıçı axtarışlarına başlayıb. Son dönəmlərdə klubla çox sıx əməkdaşlıq edən və ''Cim-Bom''a Mertens, Sançes, Zaniolo, Torreyra, İkardi, eləcə də son olaraq Osimhen kimi ulduzları qazandıran tanınmış italiyalı menecer Corc Qardi indi də rəhbərliyə ''Napoli''nin qapıçısı Aleks Mereti təklif edib. 2018-dən bu yana Neapol klubunun şərəfini qoruyan 27 yaşlı qapıçının müqavilə müddəti gələn yay başa çatacaq. Rəhbərlik razılığını versə, Qardi Meret ilə danışıqlara başlayacaq. İtaliyalı qapıçının hazırda transfer dəyəri 12 milyon avro civarındadı.

ƏLİ