Fernando Muslera böyük ehtimalla ''Qalatasaray''dan ayrılmayacaq.

Təcrübəli əlcək sahibinin müqavilə müddəti cari mövsümün sonunda başa çatır. Onunla rəhbərlik arasında uzun müddətdi yeni müqavilə ilə bağlı aparılan danışıqlarda ortaq məxrəcə gəlmək mümkün olmurdu. Amma bu günlərdə nəhayət, tərəflər razılığa gələ bildi.

Türkiyə mətbuatının yazdığına görə yeni müqavilə ''1+1'' illik olacaq. Musleranın 2,5 milyon avroya bərabər olan illik maaşında dəyişiklik olmayacaq. Tərəflər məhz maddi məsələdə anlaşa bilmirdilər. Rəhbərlik uruqvaylı qapıçının maaşını azaltmaq istəyirdi. Amma 37 yaşlı qapıçı həmin pulu qazanmaqda davam edəcək. Yeni müqavilənin mövsüm başa çatmamış imzalanacağı gözlənilir.

Qeyd edək ki, 2011-ci ildən ''Qalatasaray''da olan Muslera indiyə qədər bu klubda 499 rəsmi oyunda forma geyib. O, 533 qol buraxıb və 178 oyunda qapısını toxunulmaz saxlayıb. ''Qalatasaray'' bu mövsüm çempion olsa, bu, Musleranın İstanbul nəhəngindəki 16-cı titulu olacaq.

ƏLİ