Türkiyə çempionatının 7-ci turunda ''Qalatasaray'' ''Kasımpaşa''nı qəbul etdi.

Əla formada olan və son matçlarda önəmli qələbələr qazanan İstanbul nəhəngi ilk yarıda mükəmməl futbolla fanatlarını sevindirdi. Viktor Osimhen nəhayət, yeni klubunda qol hesabını açdı və hələ fasiləyə qədər dubl etdi. Daha bir qolu da aktivinə Mauro İkardi yazdı. Düşünmək olardı ki, ''Cim-Bom'' oyunu rahat qələbə ilə başa vuracaq. Amma sonrakı dəqiqələrdə ağlasığmaz hadisələr yaşandı. Hələ fasiləyə qədər qollardan birinin əvəzini çıxan ''Kasımpaşa'' ikinci hissəni üstün keçirərək daha iki qol vurdu. Nəticədə oyun sürpriz şəkildə 3:3-lük bərabərliklə yekunlaşdı və ''Qalatasaray'' öz rekordunu yeniləmək fürsətini əldən verdi. Belə ki, komanda tarixində ilk dəfə superliqada mövsümə ardıcıl 7 qələbə ilə başlamış olacaqdı. Maraqlıdı ki, ''Qalatasaray''ın daha öncə Türkiyə çempionatında 3 top fərqi ilə öndə olduğu ev oyununda qələbəni əldən verməsinə yalnız bir dəfə rast gəlinmişdi. Bu hadisə 1983-ün iyununda ''Fənərbaxça'' ilə derbidə yaşanmışdı (4:4).

ƏLİ