Dünən Türkiyə çempionatının 22-ci turunda lider ''Qalatasaray'' sonuncu pillədəki ''Ümraniyəspor''u qəbul etdi.

Autsayder yaxşı təsir bağışlayaraq hesabda iki dəfə önə çıxdı və fasiləyə 2:1 öndə yollandı. Amma ''Cim-Bom'' argentinalı ulduz İkardinin ikinci hissədə vurduğu 2 qol sayəsində 3:2 hesablı əzmkar qələbə qazandı. Bu qələbə ''Qalatasaray''a növbəti dəfə adını Türkiyə futbol tarixinə yazdırmağa imkan verdi. ''Aslan'' rəsmi oyunlarda ardıcıl 14-cü qələbəsini qazanaraq Türkiyə futbolunda 1959-dan, yəni peşəkar səviyyədə çempionat keçirilməyə başlandığı vaxtdan bu yana bunu bacaran ilk komanda oldu! Bu qələbələrdən 11-i superliqa, 3-ü kubok çərçivəsində əldə olunub. Bununla da Okan Buruk Türkiyə çempionatı tarixində bir mövsümdə ən uzun qələbə seriyasına malik olan yerli məşqçilər – Şenol Günəş ilə Ziya Doğanın rekordlarını təkrarladı. Hər iki mütəxəssis bu rekordu ''Trabzonspor''un baş məşqçisi qismində əldə etmişdi. Günəş 1995/96, Doğan isə 2003/04 mövsümündə. Onu da vurğulayaq ki, Türkiyə çempionatı tarixində bir mövsümdə ardıcıl qələbə seriyası ilə bağlı rekord ''Beşiktaş''a məxsusdu (1959/60, 13).