Sabiq UFC çempionu Konor Makqreqor dopinq-testinin nəticələri ilə bağlı məktubu sosial şəbəkədə yayıb:
“Əziz Konor Makqreqor, 2024-cü il sentyabrın 13-də təqdim etdiyiniz Е004244 saylı nümunənin laboratoriya yoxlaması zamanı mənfi nəticə verdiyini sizə çatdrdığımıza görə şadıq. UFC-də təmiz idmana dəstək verdiyinizə görə sağ olun”.
Konor sosial şəbəkədə yaydığı skrinşotu bu sözlərlə müşayiət edib: “İki dəfə UFC-nin ən çox yoxlanılan döyüşçüsü. Artıq döyüş tarixi almağı haqq etdim”.
Xatırladaq ki, Konor 2021-ci ilin yayında keçirdiyi sonuncu döyüşdə Dastin Poryeyə texniki nokautla uduzub. 36 yaşlı irlandiyalı iyunda amerikalı Maykl Çendlerlə döyüşməliydi, ancaq barmağını zədələdiyindən oktaqona çıxa bilmədi.
Dopinq-testi təmiz çıxan Konorun gələn il oktaqona dönməsi yolunda artıq heç bir maneə yoxdu.

O, ESPN-ə müsahibəsində 2025-ci ildə iki döyüş keçirməyi planlaşdırdığını bildirib. Ümumiyyətlə, irlandiyalı MMA çərçivəsində indiyə qədər 28 döyüş keçirib: 22 qələbə (19-u nokautla), 6 məğlubiyyət (2-si nokautla).