Makqreqor iyunda da oktaqona dönə bilməyəcək
UFC prezidenti Dana Uayt iki çəki dərəcəsində sabiq çempion Konor Makqreqorun (22-6) oktaqona dönüşünün ləngiməsini Dastin Porye (29-8) ilə döyüşdə aldığı zədənin ağırlığı ilə izah edib:
“Konor nə vaxt qayıdacaq? Konor ən arzuolunmaz zədələrdən birinin ardından qayıdır. Anderson Silvanı və ya Kris Vaydmanı xatırlayın. Onlar sümük qırılmasından sonra nə dərəcədə tez qayıtdılar? İkincisi, Konora pul lazım deyil. Həbibə pul lazım deyil, o karyerasını bitirib. Bu suallar Konora ünvanlanmalıdı, mənə yox. Mən yalnız bunu bilirəm ki, Konor məşq edir, ancaq hansı səviyyədə məşq etdiyini bilmirəm. Əmin olmalıyam ki, onun tam həcmdə çalışan məşq düşərgəsi var, Konor döyüşə hazırdı. Tezliklə Konorun yeni filmi yayılacaq, biznesi, pulu var. Belə adamlar tam fərqli həyat ritminə malik olurlar”.
Uaytın belə açıqlama ilə çıxış etməsi səbəbsiz deyil. Makqreqor bir müddət əvvəl UFC-ni çıxışına şərait yaratmadığına görə tənqid etmişdi. İrlandiyalı ilin əvvəlində onu da bildirmişdi ki, iyunun 29-da Maykl Çendlerlə (23-8) döyüşəcək. Amma Uayt Konorun tarix açıqlamasını da bəyənməyib:
“Ümid edirəm ki, döyüş bu il baş tutacaq. Ancaq hələ ki tarix yoxdu. Payıza ümid edirəm. Payizda bunu bacaracağıq”.
