Transfer dönəminin son günlərində müdafiənin cinahını gücləndirmək istəyən “Qalatasaray” bütün diqqətini “Roma”lı Nikola Zalevskiyə yönəltmişdi.

Hətta şayiələrə inansaq, “Cim-Bom” məhz Zalevskiyə üstünlük verdiyindən Filip Kostiç uğrunda mübarizədə “Fənərbaxça”ya məğlub oldu. Amma rəhbərlik bu transferin böyük bir “sabun operası”na çevriləcəyini və ən əsası sonda polşalı futbolçunun kaprizləri üzündən baş tutmayacağını bilsəydi, bəlkə də bu məsələyə bu qədər vaxt ayırmazdı.

“Qalatasaray” rəsmiləri transferi tamamlamaq və İstanbula Zalevski ilə birlikdə qayıtmaq üçün çərşənbə axşamı İtaliyanın paytaxtına yollandılar. Həmin gündən etibarən Türkiyə mətbuatında bu transferlə bağlı müxtəlif şayiələr yayılmağa başladı. Bir ara artıq anlaşmanın əldə olunduğu bildirildi. Hətta guya Zalevski o qədər sevinirmiş ki, çərşənbə günü bu transferi qeyd etmək üçün dostlarıyla birlikdə kiçik məclis də təşkil edibmiş. Sonradan guya klublar arasında maliyyə baxımından anlaşma əldə olunmadı.

Amma reallıq tam başqa cür imiş. Bilindiyi kimi, 22 yaşlı futbolçu “Roma” ilə müqaviləsinin son ilinə qədəm qoyub. Yəni onun müqavilə müddəti gələn yay başa çatacaqdı. Bu üzdən Zalevski Türkiyə çempionundan böyük pullar tələb etməyə başladı. “Sarı-qırmızılar” “Roma”ya “8+3” milyon avro təklif etdilər və klublar arasında dərhal razılıq əldə olundu. Zalevski isə İtaliyada illik 500 min avrodan da az qazanmasına baxmayaraq “Qalatasaray”ın 2,5 milyon avroluq təklifini bəyənmədi! O, “Aslan”dan illik 3,2 milyon avro maaş olmaqla dördillik müqavilə, üstəlik 500 min avro imza parası və bonuslar tələb etdi.

İtaliyada iki gün keçirən və bu şərtlərin ağır olduğu qənaətinə gələn “Qalatasaray” rəsmiləri cümə axşamı danışıqları dayandıraraq masadan qalxdılar. Zalevskinin bu hərəkəti “Roma” rəhbərliyinin də səbrini daşırdı. Çünki futbolçu “canavalar”ın da yeni müqavilə təklifini geri çevirdi. Bu şərtlər altında onun yanvarda istənilən klubla danışıqlar aparmaq fürsəti olacaq. “Roma” rəhbərliyinin qərarı ilə Zalevski əsas komandadan kənarlaşdırılıb! Onun qışda özünə “Qalatasaray”dan daha yaxşı şərtlər təklif edən bir klub tapıb-tapmayacağını isə zaman göstərəcək.
Bu transferin baş tutmaması “Qalatasaray” fanatlarının etirazına səbəb oldu.

Sosial şəbəkədə rəhbərliyə qarşı böyük etiraz dalğası baş qaldırdı. Fanatları narazı salan daha bir məqam odu ki, bu yay Kərəm Aktürkoğlu, Tete, Zaha kimi önəmli cinah oyunçularının ayrılmasına baxmayaraq, onların yerinə heç kim transfer edilmədi. Dünən, yəni Türkiyədə “transfer pəncərəsi”nin bağlandığı son gündə daha iki mühüm olay baş verdi.

Təzyiqlərin artması üzündən idman direktoru Cenk Ərgün istefa verdi! Son iki ildə komandaya mühüm oyunçuları cəlb edən Ərdən Timurun bu yay rəhbərlikdən ayrılmasının ardından Cenk Ərgün transferlərdə daha fəal rol oynamağa başlamışdı. Ən maraqlısı odu ki, rəhbərlik bu həftənin əvvəlində Ərgünlə ikiillik yeni müqavilə imzalamışdı! Əvvəlki illərdə fərqli dönəmlərdə “Qalatasaray”da işləmiş 48 yaşlı Ərgün 2022-nin iyununda idman direktoru vəzifəsinə gətirilmişdi.

Digər önəmli xəbər isə odu ki, “Cim-Bom” Zalevskinin əvəzinə son gündə “Frayburq”lu Roland Şallaini transfer etdi. Dördillik müqavilə imzalanan Macarıstan yığmasının üzvünün keçidi istanbullulara 6 milyon avroya başa gəldi. Bu məbləğ 3 il ərzində ödəniləcək. Onun maaşı 2,5 milyon avro təşkil edəcək. Amma Zalevskidən fərqli Şallai hücumameyilli futbolçudu. O həm vinger, həm də mərkəz yarımmüdafiəçisi kimi oynaya bilir. Karyerasına “Puşkaş”da başlayan, daha sonra “Palermo” və APOEL-də top qovan 27 yaşlı futbolçu 2018-dən bəri “Frayburq”da çıxış edirdi.

Almanlar 6 il öncə onu 4,5 milyon avroya transfer etmişdilər. Şallai 2023/24 mövsümünü 37 oyun, 8 qol, 4 məhsuldar ötürmə göstəriciləri ilə tamamlayıb.
“Qalatasaray” haqda daha iki xəbəri qeyd edək. Mərakeş yığmasının heyətində zədələnən Hakim Ziyeş 3 həftəliyə sıradan çıxıb. Bundan başqa, Xəlil Dərvişoğlu “Qaziantep”ə birilliyə icarəyə verilib.