Okan Burukun başçılığı altında hələ ki uğurlu mövsüm keçirən və Türkiyə çempionatında inamla liderlik edən “Qalatasaray”la bağlı maraqlı bir xəbər var.
Yanvarın 14-də FİFA-dan İstanbul nəhəngini şoka salan bir qərar verildi. Belə ki, qurum Türkiyənin 22 qat çempionuna transfer qadağası qoydu. Həmin vaxt “Cim-Bom” “Sivasspor”lu Uğur Çiftçinin transferi üçün həm futbolçunun özü, həm də klubu ilə danışıqlar aparırdı. Transfer qadağasından sonra danışıqları bir qədər dayandırmaq lazım gəldi. Türkiyə mətbuatının iddiasına görə, Lukas Torreyranın meneceri klub tərəfindən ona ödənilməli olan 18500 dollarlıq məbləğə görə FİFA-ya şikayət edibmiş. FİFA da onun şikayətini haqlı sayıbmış. Amma bir müddət sonra həqiqət üzə çıxdı. “Sarı-qırmızılar”ın həqiqətən də borcu var imiş. Amma Torreyranın menecerinə yox, onun ilk klubu olan “Peskara”ya. İtaliyalılar uruqvaylını yetişdirən klub kimi “Qalatasaray”dan məhz bu məbləği tələb edib. Onlar tələbi kluba futbolçunun meneceri vasitəsi ilə çatdırıblar. Ona görə də Türkiyə mətbuatında məsələ yanlış anlaşılıb. Dünən məlum oldu ki, əslində söhbət 18236 dollardan gedir və ən əsası “Qalatasaray” bu məbləği çoxdan “Peskara”nın hesabına yatırıb. Sadəcə, bankdan qaynaqlanan problem üzündən pul qarşı tərəfə vaxtında çatmayıb. Bu üzdən də “Aslan”a cəza verilib. Amma problem artıq yoluna qoyulub. “Qalatasaray” yönəticiləri ödəmənin baş tutduğunu FİFA-ya bildirdikdən sonra qurumdan müsbət cavab gəldi və cəza aradan götürüldü. Dünəndən, yəni yanvarın 18-dən etibarən “Qalatasaray” artıq istədiyi futbolçunu heyətinə qatmaq hüququna malikdi. Uğur Çiftçinin başıbəlalı keçidinə gəlincə, bu transferin qarşısında duran əsas maneə hələ də həll olunmayıb. “Sivasspor” müəyyən məbləğlə yanaşı, “Cim-Bom”dan Əmrə Taşdəmiri də icarə əsasında heyətinə qatmaq istəyir. Amma 27 yaşlı müdafiəçi birmənalı şəkildə “Sivasspor”a keçmək istəmir. Rəhbərliyin bu problemi necə yoluna qoyacağı maraq doğurur.