Avqustun 20-21-də keçirilən oyunlarla Çempionlar Liqasının (ÇL) pley-off mərhələsinə start verildi.

İlk oyunlar postsovet məkanı üçün uğursuz alındı.
Təəssüf ki, məğlubların sırasında Azərbaycanın son çempionu da var. “Qarabağ” Zaqrebdə “Dinamo”dan üç cavabsız top buraxmaqla işini çox çətinə saldı. Ağdamlıların Xorvatiyanın dəyişməz çempionunu mübarizədən kənarlaşdıraraq qrupa vəsiqə qazanmaq ehtimalı yetərincə azaldı.

Bu mərhələdə postsovet məkanını təmsil edən digər komanda da ilk matçda məğlub oldu. “Dinamo” məlum səbəbdən “Zaltsburq”u Ukraynada yox, neytral meydanda qəbul etdi. Polşanın Lublin şəhərində baş tutan matç təxminən bərabər mübarizə şəraitində keçdi. Avstriyalılar kiyevliləri qapıya dəqiq zərbələr üzrə 6:4 hesabıyla üstələdilər. İlk hissəsi nominal qonaqların minimal üstünlüyü ilə başa çatan oyunun fasiləsindən sonra bir qədər də fəallaşan “Zaltsburq”un növbəti cəhdi də uğurlu alındı. Kyerqorun penaltidən vurduğu ikinci qol Aleksandr Şovkovskinin çalışdırdığı “Dinamo”nun qrupa düşmək şansını bir qədər azaltdı.

3-cü təsnifat mərhələsində “Fənərbaxça”nı mübarizədən kənarlaşdıran (2:1, 1:1) “Lill” Fransada “Slaviya”nın qapısından iki cavabsız top keçirdi. Amma Çexiyanın digər təmsilçisi “Sparta” İsveçdə “Malmö”nü 2:0 hesabıyla məğlub etməklə qrupda oynamaq şansını artırdı.

pley-off, ilk oyunlar
Lill (Fransa) – Slaviya (Çexiya) 2:0
Devid, 52. Jeqrova, 77.
Lill: Şevalye, Santuş, Menye, Diakite, Aleşandre Ribeyro, Qudmundsson (İsmaili, 90+1), Andre, Kabelya (Şahraui, 90+4), Haraldsson (Mikau, 90+1), Jeqrova, Devid (İliç, 90+1).

Dinamo (Ukrayna) – Zaltsburq (Avstriya) 0:2
Nene, 29. Kyerqor, 50-p.
Dinamo: Buşan, Dubinçak, Mixavko, Popov, Karavayev (Tımçik, 71), Şaparenko, Brajko (Mixaylenko, 64), Pixalenok, Kabayev (Supryaqa, 84), Vanat (Braharu, 71), Yarmolenko (Voloşin, 65).

Dinamo (Xorvatiya) – QARABAĞ (AZƏRBAYCAN) 3:0
Pyatsa, 29. Kulenoviç, 75; 80.

Bude/Qlimt (Norveç) – Srvena Zvezda (Serbiya) 2:1
Byortuft, 52. Myayattya, 62 – Mimoviç, 75.

Malmö (İsveç) – Sparta (Çexiya) 0:2
Larsen, 31-öz qapısına. Rineş, 89.

Midtüllann (Danimarka) – Slovan (Slovakiya) 1:1
Çilufya, 79 – Blekmen, 59.

Yanq Boyz (İsveçrə) – Qalatasaray (Türkiyə) 3:2
Monteyro, 3; 45+4. Uqriniç, 86-p. – Batşuayi, 67; 72.

Cavab oyunları avqustun 27-28-də keçiriləcək.