Avqustun 17-də Avropa Liqasında (AL) 7 cavab oyunu keçirildi. Bununla da turnirin 3-cü təsnifat mərhələsinə yekun vuruldu.

"Football-plus.az" xəbər verir ki, bu mərhələ yeganə təmsilçimiz üçün uğurlu alındı.

Çempionlar Liqasının 2-ci təsnifat mərhələsində Polşa çempionu “Rakuv”a uduzan (2:3, 1:1) “Qarabağ” eyni aqibəti yaşayaraq “Molde” (Norveç) səddini keçə bilməyən (1:0, 0:2) HİK-ə Bakıda olduğu kimi Finlandiyada da 2:1 hesabıyla qalib gəldi. Bu mərhələdə sabiq SSRİ-yə daxil olan 6 ölkədən bir o qədər komanda iştirak etdi. “Qarabağ”dan başqa yalnız “Şerif” pley-offa adlaya bildi.

“Neftçi”nin sabiq baş məşqçisi Roberto Bordinin çalışdırdığı Moldova çempionu evdə BATE-ni 5:1 hesabıyla darmadağın etməklə mərhələni keçmək üçün əla şans qazanmışdı. Belaruslarla cavab görüşü heç-heçə nəticələndi - 2:2.

“Astana”nın da növbəti mərhələyə vəsiqə qazanmaq şansı vardı. Lakin Qazaxıstanın son çempionu evdə 2:1 hesabı ilə qalib gəldiyi “Ludoqorets” ilə Bolqarıstandakı matçda rəqabət apara bimədi – 1:5. Çexiyada “Slaviya”ya 0:3 hesabıyla uduzmaqla şansını çətinə salan “Dnepr-1” məlum səbəbdən Slovakiyanın Koşitse şəhərində keçirilən cavab oyununda heç-heçəyə nail oldu – 1:1. Postsovet məkanından olan daha bir komanda isə rəqibi qarşısında yenə aciz göründü: “Jalgiris” Litvada 1:3 hesabıyla məğlub olduğu “Həken”dən İsveçdə 5 cavabsız top buraxdı.

Qeyd edək ki, AL-in 3-cü təsnifat mərhələsini keçə bilməyən komandalar mübarizəni Konfrans Liqasının pley-offunda davam etdirəcəklər.

3-cü təsnifat mərhələsi, cavab oyunları
HİK (Finlandiya) - QARABAĞ 1:2 (ilk oyun – 1:2)
Hostikka, 10 – Bayramov, 45+3-p. Benzya, 56.
BATE (Belarus) - Şerif (Moldova) 2:2 (1:5)
Kontsevoy, 25. Laptev, 90+4 – Rikardinyo, 40. Luvannor, 45+2-p.
Ludoqorets (Bolqarıstan) - Astana (Qazaxıstan) 5:1 (1:2)
Tekpetey, 25; 50. Petrovski, 47; 58. Despodov, 67 - Darbo, 29.
Dnepr-1 (Ukrayna) - Slaviya (Çexiya) 1:1 (0:3)
Rubçinski, 45+1 - Yureçka, 52.
Həken (İsveç) - Jalgiris (Litva) 5:0 (3:1)
Hrstiç, 28. Samuel Qustafsson, 56. Sadik, 63; 73-p. Sonko, 90+2.
Breydablik (İslandiya) - Zrinski (Bosniya və Hersoqovina) 1:0 (2:6)
Yakovleviç, 56- öz qapısına.
Genk (Belçika) - Olimpiakos (Yunanıstan) 1:1 (0:1)
Peyntsil, 30-p. - Aleksandropulos, 90+6.

İlk oyunları avqustun 24-də keçiriləcək pley-offda cütlər belə formalaşıb:

Olimpiya (Sloveniya) – QARABAĞ, Ludoqorets – Ayaks (Niderland), Klaksvik (Farer adaları) – Şerif, Yunion (Belçika) – Luqano (İsveçrə), AEK (Yunanıstan) – Dinamo (Xorvatiya) cütünün məğlubu – Sparta (Çexiya), Həken – Aberdin (Şotlandiya), LASK (Avstriya) – Zrinski, Slovan (Slovakiya) – Aris (Cənubi Kipr), Slaviya – Zarya (Ukrayna), Olimpiakos – Çukariçki (Serbiya).