İyulun 25-də Çempionlar Liqasının (ÇL) 2-ci təsnifat mərhələsinə start verildi.

"Football-plus.az" xəbər verir ki, çərşənbə axşamı ilk görüşlər çərçivəsində 7 oyun keçirildi.

Bu mərhələdə diqqəti daha çox cəlb edən matçlardan biri İsveçrədə keçirildi. Yerli “Servett” ilə “Genk” arasındakı oyun təxminən bərabər mübarizə şəraitində keçdi. Ev sahibləri topla oynama planında belçikalılardan geri qalsa da (45-55 faiz), qapıya (12-7) və “çərçivə”yə (7-5) zərbələr üzrə rəqibini üstələdi. Hesabı qonaqların açdığı ilk görüşdə qalib müəyyənləşmədi - 1:1.

Qonşu ölkələrin çempionları arasındakı görüşdə ev sahibləri qalib gəldilər: HİK (Finlandiya) – Molde (Norveç) matçının nəticəsini bir qol müəyyənləşdirdi. “Zrinski” – “Slovan” oyununda da qapı toru bir dəfə silkələndi. Amma Bosniya və Hersoqovinadakı matçda qonaq Slovakiyanın çempionu qalib gəldi.

ÇL-də mübarizəyə mini-turnir formatında keçirilən ilkin mərhələdən başlayan və 1-ci təsnifat mərhələsində “Şemrok Rovers”i mübarizədən kənarlaşdıran (1:0, 2:1) “Breydablik”in qələbə seriyası qırıldı. İslandiyanın son çempionu evdə “Kopenhagen”ə uduzdu. Kopavoqurdakı oyunun qəhrəmanı Larsson oldu. Danimarkalıların start fitindən 43 saniyə sonra hesabı açan 26 yaşlı hücumçusunun 6 dəqiqə sonra Falka dabanı ilə verdiyi məhsuldar ötürməni görməyə dəyərdi.

Zaqrebdəki matçın ilk yarısını izləyərkən adamda sanki son çempionların yox, müxtəlif divizionları təmsil edən rəqiblərin qarşılaşdığı təəssüratı oyanırdı. Bəli, “Dinamo” – “Astana” cütündə meydan sahibləri favorit sayılırlar. Amma ilk oyun Xorvatiya çempionunun Qazaxıstandan olan rəqibindən azı bir baş üstün olduğunu göstərdi. “Maksimir”dəki matçın qəhrəmanı İvanuşets oldu. 24 yaşlı yarımmüdafiəçi “Dinamo”nun inamlı qələbəsində topa hər iki ayağı və başı ilə zərbə endirərək het-trik etməklə böyük rol oynadı. Mahir Emreli 80-ci dəqiqədə Petkoviçin yerinə meydana çıxarkən hesab 4:0 idi. Beləliklə, yığmamızın hücumçusunun praktiki olaraq ÇL-in növbəti mərhələsində oynayacağını iddia etmək mümkündü. Qriqori Babayanın çalışdırdığı “Astana” isə böyük ehtimalla mübarizəni Avropa Liqasının 3-cü təsnifat mərhələsində davam etdirəcək.

Ümumiyyətlə, ilk oyun günü postsovet məkanından olan komandalar üçün uğursuz alındı. Srağagün sabiq SSRİ-yə daxil olan ölkələrin 3 təmsilçisi meydana çıxdı. “Jalgiris” Litvada “Qalatasaray”a məğlubiyyətdən son dəqiqələrdə qaça bildi - 2:2. “Dnepr-1” evdə “Panatinaikos”la rəqabət apara bilmədi. Amma Ukrayna çempionatının gümüş mükafatçısının Yunanıstan klubu ilə məlum səbəbdən Dnepropetrovskda oynamadığını qeyd etməliyik. Aleksandr Kuçerin komandası Slovakiyanın Koşitse şəhərində keçirilən matçda güclü rəqibi qarşısında aciz qaldı. Qonaqların ilk iki qolunu sloveniyalı Şporarla serbiyalı Curiçiç vurdu. Balkan yarımadasından olan legionerlərə məhsuldar ötürmələri Xuan Karlos verdi. 33 yaşlı ispaniyalı müdafiəçi ilk ötürməsindən əvvəl topu rəqib oyunçunun ayaqları arasından keçirməklə də diqqəti cəlb etdi. Bu da son deyil. Koşitsedə futbol şousu göstərən “Real”ın yetirməsi afinalılara penalti də qazandırdı ki, bu şansı İoannidis qaçırmadı. Əsas vaxtın son dəqiqəsində təsəlli qolunu vuran ukraynalıların ÇL ilə erkən vidalaşmaq ehtimalı yüksəkdi.