Yarımçıq turun elə də kobud mübarizə şəratində keçmədiyini deyə bilərik.

Təbii, “Kəpəz” – “Turan Tovuz” oyunu istisnadı. Həmin oyunda da ilk yarıda cəmi bir sarı vərəqə göstərildisə, fasilədən sonra Cavid Cəlilov 5 dəfə əlini cibinə saldı. Hakim qərarlarıyla bağlı daha bir maraqlı məqam var. “Sumqayıt” – “Səbail”, “Neftçi” – “Sabah” oyunlarında yalnız meydan sahibləri cəzalandı.

Sumqayıt – Səbail, RƏVAN HƏMZƏZADƏ
Komandalar azarkeşlərini yaxşı mənada təəccübləndirməyi bacardı. Fiziki və psixoloji hazırlığın qaneedici səviyyədə olduğu matç rəqabətli keçdi. Oyunu baxımlı edən cəhətlərdən biri də futbolçuların nizam-intizama əməl etməyə çalışmasıydı. Burda qayda pozuntularını, xüsusilə kobudluqları sonuncu çıxış yolu kimi dəyərləndirmək olar. Əlbəttə, Rəhim Sadıxov (Sumqayıt) Rüfət Abdullazadəyə (Səbail) qarşı daha səliqəli çıxış edib “sarı” almaya bilərdi. Hər halda, günah ədalət təmsilçisində deyil. Axı o, cəmi üç sarı vərəqə verdi ki, burda nə güzəştdən, nə də dozanın artıqlığından söhbət gedir. Ümumiyyətlə, Həmzəzadə mövsümün ikinci sınağından da üzüağ çıxdı. Samir Abasov və köməkçisi Mübariz Orucovun etirazları isə emosional yanaşmadan başqa bir şey deyildi.

Kəpəz – Turan Tovuz, CAVİD CƏLİLOV
Cari mövsümdə premyer-liqada ilk matçına təyinat alan Cavid Cəlilova Kamran Bayramov, Zöhrab Ababsov və dördüncü hakim qismində Rauf Allahverdiyev kömək edirdi. Ədalət təmsilçilərinin işinin öhdəsindən layiqincə gəldiyini deyə bilərik. Onsuz da mübarizənin, əsasən meydanın “Kəpəz”ə aid hissəsində getməsi baş hakimin işini asanlaşdırmışdı. Bu üzdən də qarşılaşmanın idarə edilməsində, demək olar ki, heç bir çətinlik yaşanmadı. Doğrudu, matçın sonlarına yaxın sarı vərəqələrin sayı nisbətən artdı. Hansı ki, sona doğru oyunçuların hakim qərarlarına etirazlarına görə haqlı qərar saymaq olar. Ümumilikdə ziddiyyətli, mübahisəli hansısa epizod qeydə alınmadı.

Neftçi – Sabah, TURAL QURBANOV
Gənc hakimlərimizdən sayılan Tural Qurbanovun idarə etdiyi bu görüşdə də diqqətçəkən xüsusi bir məqam olmadı. Pavol Safrankonun (Sabah) vurduğu qolun ofsayd səbəbindən sayılmaması düzgün qərar idi. Elə bunu teletəkrarda da görmək mümkün idi. Yalnız oyunun son dəqiqələrində Ramil Şeydayev (Neftçi) rəqibin cərimə meydançası daxilində yerdə qalarkən “Forza Neftçi” baş hakimin ünvanına kəskin tənqidlər səsləndirdi. Həmçinin epizoda görə Qurbanovu VAR-a baxmasını da istədilər. Videotəkrarda isə toxunuşun olub-olmadığını müəyyənləşdirmək çətindi. Hər halda, oyunun VAR hakimi olan Əliyar Ağayev epizodun penalti olmadığnı düşündü. Qərarın doğru və ya yanlış olması yönündə fikir bildirmək çətindi. Ümumən idarəçilik yaxşı səviyyədə idi.