Bir turda cəmi 20 sarı vərəqə göstərilibsə, meydandan qovulan futbolçu yoxdusa, deməli, ən azı səliqəli, intizamlı mübarizənin getdiyini deyə bilərik.

Amma 35-ci turun tanıdıcı əlaməti təkcə bu olmadı. Cari mövsümdə ilk dəfə VAR-da əcnəbilər – Natan Verbumenlə Devid Qersini əyləşdi. Samir Abasov isə “Sumqayıt”ı dartırlar” məsələsinin axırı belə olmalıydı”, - deyə “Kəpəz” – “Zirə” oyununda VAR hakiminin əcnəbi olmamasından gileyləndi.

Qarabağ – Turan Tovuz, CAVİD CƏLİLOV
Bu komandaların oyun tərzinin oxşar olduğunu bilirsiz. Həm Ağdam, həm də Tovuz təmsilçisi tutarlı hücumlarla qol vurmaq baxımından keyfiyyətli oyun göstərir. Belədə ciddi rəqabətə və dinamik matça, sadəcə, hakim qərarları mane ola bilərdi. Lakin Cəlilov bu mənada, demək olar ki, azarkeş rolunda çıxış etdi. O, komandaların sərbəst oyununa şərait yaratdı və cəmi bir dəfə əlini cibinə saldı. Xoşbəxtlikdən futbolçular da hakimin niyyətini anlayıb qayda pozuntularından qaçmağa üstünlük verdilər. Belədə məhsuldar v baxımlı oyuna şahidlik etdik.

Sabah – Sumqayıt, İNQİLAB MƏMMƏDOV
Turun mərkəzi matçı təcrübəli FİFA referisinə tapşırılmışdı. Hər iki komandanın avrokuboklar uğrunda mübarizə aparması müəyyən aqressivlik vəd etsə də, belə olmadı. Futbolçuların həyəcanın və təzyiqin öhdəsindən gəlməyə çalışdığı anlaşılırdı. Düzdü, Samir Abasov matç boyunca hakimin qərarlarına emosional reaksiya verdi. Lakin burda konkret qərəzdən və ya haqsızlıqdan danışmaq yersiz olar. Ədalət təmsilçisi ya əcnəbi hakimin varlığından, ya da biabırçı idarəçiliyə görə cəzalanan həmkarlarının sırasına qoşulmaqdan çəkindiyi üçün yetərincə ideal davrandı. İstər “Sabah”ın sayılmayan qolu, istər əsas vaxta artırılan dəqiqələr, istərsə də vərəqələr dəqiq idi.

Zirə - Kəpəz, RƏVAN HƏMZƏZADƏ
Avrokuboklara vəsiqə qazanmaq istəyən “Zirə” Tovuz səfərindən mütləq 3 xalla dönməliydi. Çünki əks təqdirdə Avropaya can atan rəqiblərindən geri qala bilərdi. Rəşad Sadıqovun komandası vacib qələbəni 1 qolla qazandı. Ancaq “qartallar”ın qolu nə dərəcədə qaydalar çərçivəsində vurması maraq doğurur. Qol ötürməsi verilərkən topun “Zirə”nin oyunçusu Rəhim Sadıxovun əlinə dəydiyi aşkar şəkildə göründü. Gəncəlilər buna etiraz edərkən isə baş hakim əlin bağlı vəziyyətdə olduğunu bildirdi. “CBC Sport”un yayınında dəfələrlə həmin epizoda baxsaq da, topa əllə yön verildiyi aşkar görünür. Maraqlıdı ki, oyundan sonra “Kəpəz”in çalışdırıcısı Adil Şükürov Həmzəzadənin ölkənin ən yaxşı hakimlərindən biri olduğunu bildirdi.

Qəbələ - Araz-Naxçıvan, ELVİN BAYRAMOV
Oyunun ən maraqlı yönlərindən biri Elmar Baxşıyevin ilk dəfə Qəbələ şəhər stadionuna rəqibin məşçisi qismində gəlməsiydisə, digər maraqlı məqam da Elvin Bayramovun ilk dəfə premyer-liqa oyununa təyinat alması idi. Premyer-liqa təcrübəsi olmasa da, Bayramov debüt oyununu qənaətbəxş səviyyədə idarə etdi. Tərəflərin narazılığına səbəb olacaq, qərəzli qərar vermədi. Nə də matçın tempini düşürən yersiz fitlər səsləndirdi. Komandalar hər nə qədər aqressivlikdən uzaq olmağa çalışsa da, debütant hakim 7 dəfə əlini cibinə salmalı oldu.

Səbail – Neftçi, TURAL QURBANOV
Paytaxt derbisi olduqca maraqlı və gərgin alındı. Referinin qərarlarının və mövqe seçiminin doğru olduğunu vurğulamaq lazımdı. Xırda etirazları saymasaq, nə futbolçular, nə də baş məşqçilər Qurbanovdan ciddi narazılıq etdi. Yalnız “ağ-qaralar”ın 3-cü qolundan sonra Madi Queta baş hakimin üzərinə şığıyıb, nəyəsə etiraz etdi. Amma bunun səbəbini, yəqin ki, heç kim, “Səbail”in futbolçuları da anlamadı. Ümumilikdə Tural Qurbanov və briqadası oyunu ideal səviyyədə idarə etdi.