17-ci turun ən maraqlı cəhətlərindən biri Azərbaycan derbisinin vərəqəsiz bitməsidi.

Çox güman, “Neftçi” – “Qarabağ” duellərində ilk dəfə belə hal yaşandı. Qalan 4 oyunda isə 20 sarı, 1 qırmızı vərəqə göstərildi. Samuel Tettehin adına yazılan həmin yeganə “qırmızı” isə “Qəbələ”yə darmadağın bahasına başa gəldi.

Kəpəz – Sumqayıt, CAVİD CƏLİLOV
Meydanda gərgin, maraqlı, kreativ oyun getdi. Çoxları Cavid Cəlilovun işinin çətin olacağını gözləsə də, referinin üzərinə böyük yük düşmədi. Oyunun axarına, demək olar ki, müdaxilə etməyən Cəlilov tempin aşağı düşməməsi üçün maksimum çalışırdı. Komandaların intizam qaydalarına bacardıqca əməl etdiyini də deyə bilərik. Referi matçboyu üç dəfə əlini cibinə atmalı oldu.

Turan Tovuz – Zirə, ELÇİN MƏSİYEV
Hakimin bəzi qərarları müzakirə oluna bilər. 19-cu dəqiqədə Zebli ilə Hakman top uğrunda mübarizə apararkən birinci yerdə qaldı. Referi qonaqların xeyrinə qərar verdi. Bu isə Ayxan Abbasovun, futbolçuların və azarkeşlərin etirazına səbəb oldu. 34-cü dəqiqədə referi "Zirə"nin xeyrinə aut qərarı verərkən bütün tribunalar ayağa qalxıb hakimin ünvanına təhqir yağdırdı. 63-cü dəqidədə Veysəl Rzayevlə Rüstəm Əhmədzadənin havada top uğrunda mübarizə zamanı ikinci yerdə qalsa da, fit susdu. Amma ümumilikdə Elçin Məsiyev oyunu normal və qaydalar çərçivəsində idarə etdi.

Səbail – Qəbələ, RAUF CABBAROV
FİFA dərəcəli beynəlxalq hakim işinin öhdəsindən layiqincə gəldi. Matçboyu “Qəbələ”ni dəstəkləyən azarkeşlərin ədalət təmsilçisi haqda xoşagəlməz ifadələr işlətməsi və narazılıq bildirməsi qətiyyən düzgün deyildi. Səbəb isə sadəcə, hesabın qaneedici olmamasıydı. Cabbarov bəzi epizodlarda güzəştə getməyi də bacardı, layiqli cəza verməyi də. Nə sarı vərəqələr, nə də “qırmızı” boşuna cibdən çıxmadı. Hakim kobud qayda pozuntusuna yol verən Tettehi meydan qovmayıb, nə etməliydi ki? Üstəlik baş məşqçilər də idarəçidən razı görünürdü. Ümumiyyətlə, Cabbarovu tənqid etsək, haqqına girərik...

Araz-Naxçıvan – Sabah, FƏRİD HACIYEV
Qarşılıqlı hücumlar şəraitində keçən oyunun ilk dəqiqələrindən hər iki komandanın baş məşqçisi referiyə kəskin şəkildə etiraz etməyə başladı. Lakin Hacıyev bütün epizodlara nəzarət edirdi. 84-cü dəqiqədə Namik Ələskərov yerdə qalıb, penalti tələb etsə də, hakim buna aldanmadı. Referi doğru qərar verdi. Futbolçuya simulyasiyaya görə sarı vərəqə də vermək olardı, amma Hacıyev mərhəmətli davrandı. Etirazlara baxmayaraq, baş hakim elə də ciddi səhvə yol vermədi. O, matçı ideala yaxın səviyyədə idarə etdi.

Qarabağ – Neftçi, RƏVAN HƏMZƏZADƏ
17-ci tura yekun vuran Azərbaycan derbisi təcrübəli hakimə tapşırılmışdı. Həm “Qarabağ”ın, həm də”Neftçi”nin oyun intizamına əməl etməsi Həmzəzadəni yorulmağa qoymadı. Daha dəqiq desək, o, tərəfləri cəzalandırmadı. Lazımi anlarda xəbərdarlıqlar edərək matçın axarını tənzimlədi, hansısa yanlış qərarla yadda qalmadı. Derbinin bu dərəcədə “sülh” şəraitində keçməsinin səbəbkarı hakim oldu, yoxsa futbolçular – bu artıq başqa söhbətin mövzusudu.