Misli premyer-liqasının 16-cı turu da geridə qaldı.

Football-plus.az xəbər verir ki, bu dəfə də bir-birindən maraqlı oyunların şahidi olduq. Rəsmi cəzalar baxımından turun nisbətən sakit keçdiyini demək mümkündü. Gərgin keçən turda hakimlər ümumilikdə 13 dəfə əlini cibinə atmağa məcbur oldu. Turda 2 qırmızı vərəqə də qeydə alındı. “Sabah” – “Şamaxı” matçında hər iki komandadan bir futbolçu birbaşa “qırmızı” ilə cəzalandı. “Kəpəz”lə matçda “Sumqayıt”ın bir futbolçusu ikinci “sarı” ilə meydandan kənarlaşdırıldı. Turun ən intizamlı komandası kimi “Qarabağ”, “Qəbələ”, “Kəpəz” və “Zirə”ni qeyd etmək olar. Bu kollektivlərdə yalnız bir futbolçu sarı vərəqə ilə cəzalanıb. Ən kobud komanda isə “Şamaxı”dı. “Şirlər”in heyətində iki futbolçu “sarı”, biri isə “qırmızı” aldı. Reportyorlarımızın qeydlərinə keçid alaq.

Zirə - Turan Tovuz, İNQİLAB MƏMMƏDOV
İnqilab Məmmədov oyunu yaxşı idarə etdi desək, yalan olar. Referi bəzi məqamlarda səhvə yol verir, sonradan isə bunu “sığortalamağa” çalışırdı. Hər iki baş məşqçi də oyun ərzində onun qərarlarına etiraz etdi. Penalti epizodundan öncə Rəhim Sadıxov yerdə qalsa da, hakim davam işarəsi verdi. 11 metrlik cərimə zərbəsini təyin etməsi belə onun hökmü ilə olmadı. VAR-dan gələn bildirişdən sonra “nöqtə”ni göstərdi. Qısası, Məmmədov oyunu istənilən səviyyədə idarə etmədi.

Sabah – Şamaxı, RƏVAN HƏMZƏZADƏ
Rəvan yenə öz ampluasında idi. Şəkili referi adətinə uyğun futbolçulara sərt oynamağa imkan verirdi. Düzdü, bu bəzən “Sabah”ın baş məşqçisi Murad Musayev tərəfindən heç də xoş qarşılanmırdı. Ancaq Həmzəzadə sərtliklə kobudluğun arasında sərhəddi müəyyənləşdirə bilirdi. Şəkili referinin matçboyu ən diqqətçəkən səhvi “Şamaxı”nın futbolçusu Elçin Mustafayev meydandan qovularkən paltardəyişmə otağına yollanmamış oyunu başlaması oldu. Halbuki Kristian Sebalyosun epizodunda baş hakim sona kimi ispanın meydanı tərk etməsini gözləmişdi.

Qəbələ - Səbail, RƏŞAD ƏHMƏDOV
Qarşılaşmanın soyuq, yağışlı və dumanlı havada keçməsi yalnız futbolçuların yox, həm də hakimlər briqadasının işini çətinləşdirdi. Buna rəğmən, Rəşad Əhmədovun rəhbərlik etdiyi ədalət təmsilçiləri maksimum peşəkarlığını ortaya qoydu. Referi oyununu dinamikasını qorumağa çalışdı. Yersiz dayanmalara imkan vermədi. Matçboyu əlini 3 dəfə cibinə atdı. Yalnız “Qəbələ”nin ikinci qolu mübahisə doğurdu. Hücumun əvvəlində top Asif Məmmədovun əlinə dəymişdi. Mərkəzi göstərən Əhmədov VAR-a baxandan sonra da qərarını dəyişmədi.

Neftçi – Qarabağ, ELÇİN MƏSİYEV
Baş hakim ilk dəqiqələrdən olduqca rahat idi. O, oyuna tez-tez müdaxilə etmir, yalnız ciddi qayda pozuntuları zamanı fitini səsləndirirdi. FİFA referisi qarşılaşmanın ilk hissəsini olduqca səliqəli idarə etdi ki, 45 dəqiqənin sonunda əlavə vaxta ehtiyac duymadı. Fasilədən sonra da oyuna tam nəzarət edirdi. Verdiyi qərarlar zamanı olduqca qətiyyətli idi. Bu da futbolçuların kobud oynamasının qarşısını alırdı. Ümumiyyətlə, referi 90 dəqiqə ərzində oyunu ideala yaxın idarə etdi.

Kəpəz – Sumqayıt, TURAL QURBANOV
Gənc referinin matçboyu, demək olar ki, yaddaqalan səhvi olmadı. Qonaqların futbolçusu Vüqar Mustafayevi meydandan kənarlaşdırmaqda da haqlı idi. Çünki yarımmüdafiəçi rəqibin əks-hücumunun qarşısını kobudluqla almışdı.