Misli premyer-liqasında artıq son 6 tura qədəm qoymuşuq.

Çempion bəlli olsa da, avrokuboklara qalan vəsiqələr uğrunda gərgin mübarizə gedir. Hətta 1 xal da qızıldan dəyərlidi. Bilindiyi kimi, qalan vəsiqələr uğrunda “Zirə”, “Sumqayıt”, “Neftçi”, “Sabah”, “Turan Tovuz” və “Səbail”  yarışır. Hər turdan sonra bəzi komandalar məhz hakim səhvi üzündən xal itirdiyini iddia edir. Bəzən də ədalət təmsilçilərinin müəmmalı qərarları mübahisə doğruru. Elə ötən tur “Səbail”in oyununda gördüyümüz mənzərə kimi. Maraqlıdı ki, turun yeganə “qırmızı”sı “dənizçilər”in payına düşdü. “Kəpəz”lə oyunda bosniyalı legioneri Adi Mehremiç qırmızı vərəqə aldı. Oyunu idarə edən Cavid Cəlilov müdafiəçiyə əvvəlcə “sarı” göstərdi. Mehremiç etiraz edincə hakim cibindən “qırmızı” da çıxardı. Cəlilov protokolda təhqir olunduğunu yazıbsa, bosniyalı müdafiəçi də onun təhqirinə məruz qaldığını bildirib.
Futbol oyunlarının təşkili ilə bağlı qaydalar elədi ki, hakimə irad tutmaq, onda günak görmək, məsuliyyətə cəlb etmək çətindi. Hər halda, Cavid Cəlilov – “Səbail” münasibətlərinə nəzər saldıq. Onun qış fasiləsindən sonra iş başında olduğu oyunlara nəzər salaq. Cavid bəy 20-ci turda “Səbail”in səfərdə “Turan Tovuz”a 1:3 uduzduğu oyunda VAR hakimi olub. 21-ci turda “Səbail”in evdə “Qarabağ”a 1:2 uduzduğu oyunu idarə edib. 27-ci turda “Səbail” “Neftçi” ilə səfər oyununda darmadağın olub – 0:3. Cəlilov bu dəfə VAR hakiminin yardımçısı kimi çalışıb. Onunla “Səbail”in yolları növbəti dəfə 29-cu turda – “dənizçilər”in artıq çempionluğu təmin edən “Qarabağ”a 2:4 uduzduğu oyunda kəsişib. Cavid bəy “Bəhramov”da VAR hakimi idi. 30-cu turun “Kəpəz”lə oyunu haqda da yuxarıda danışdıq. Ümumi qənaət belədi ki, “Səbail”in hansısa oyunun protokoluna Cavid Cəlilov ad-soyadı düşdüsə, Şahin Diniyev məğlubiyyətə hazır olmalıdı! Amma bunun qərəzdi, yoxsa sadəcə, təsadüf olduğunu daha deyə bilmərik.

RÖYANƏ OĞUZ