Almaniyada bütün diqqətlər “Bay Arena”ya yönəlmişdi.

Bilindiyi kimi “Bayer-04” ötən mövsümü möhtəşəm keçirərək həm çempionluğu, həm də ölkə kubokunu qazanmışdı. Almaniya futbolunda belə vəziyyətlərdə superkubok matçında iştirak hüququ vitse-çempiona verilir. Son 13 ildə ilk dəfə superkubok uğrunda oyunda “Bavariya” iştirak etmədi. Amma “Bavariya”sız da superkubok yetərincə maraqlı və məhsuldar alındı.

Xabi Alonso gözlənilmədən Ta, Qrimaldo, Frimponq, Virts kimi əsas oyunçuları ehtiyatda saxlayaraq Belosyan, Qarsiya, Terye kimi yeni transferlərə start heyətində şans vermişdi. Oyun qarşılıqlı qollarla başladı. Əvvəlcə Bonifas boş qapı önündə topa toxunmaqla adını tabloya yazdırdısa, çox keçmədən Miyo yerlə uzaq küncü dəqiq nişan aldı. Şvabiyalılar ilk yarıda üstün təsir bağışladılar. Meydan sahiblərini fasiləyə qədər iki dəfə qoldan dirək xilas etdi. Üstəlik 37-ci dəqiqədə Terye meydanın mərkəzində hədsiz kobudluğa yol verərək debüt oyununda çox lazımsız şəkildə komandasını azlıqda qoydu. “Ştutqart” ikinci hissəyə də fəal başladı. Sebastyan Hönessin komandası, nəhayət, layiq olduğu qolu 63-cü dəqiqədə vurdu.

Ötən mövsüm Girassi ilə birlikdə şvabiyalıların əsas qol silahı olan Dəniz Undav meydana çıxandan sonra topa ilk toxunuşdaca komandasını hesabda önə keçirdi. Yeri gəlmişkən, Girassinin Dortmund “Borussiya”sına transfer olunduğunu xatırladaq. İtiriləsi bir şeyi qalmayan Alonso əsas ulduzları meydana buraxan kimi “Bayer-04” üstünlüyü ələ keçirdi. Ötən mövsüm 81-ci dəqiqədən sonra 34 qol vuran və son dəqiqələrdə fərqlənmək üzrə “əjdaha” olan “Bayer-04” yenə ənənəsinə sadiq qaldı. 88-ci dəqiqədə Qrimaldonun ötürməsini Şik qola çevirdi. Penalti seriyasında leverkuzenlilər heç bir şansı qaçırmadı. Qonaqlarda isə Kratsiqin zərbəsini Qradetski dəf etdisə, Katompa Mvumpa topu qapının üstündən vurdu. Beləliklə, Alonsonu artıq indidən “aspirinlər”in əfsanəsi saymaq olar.

Belə ki, “Bayer-04” tarixinin cəmi 5-ci ciddi titulunu qazandı. Bu 5 tituldan 3-ü Alonsonun dönəminə təsadüf edir. Onu da bildirək ki, “Bayer-04”ün ölkədaxili turnirlərdə məğlubiyyətsiz seriyası 41 oyuna çatdı!

Bayer-04 – Ştutqart 2:2, p. - 4:3
Bonifas, 11. Şik, 88 – Miyo, 15. Dəniz Undav, 63.
Bayer-04: Qradetski, Tella (Frimponq, 73), Tapsoba, Andrix (Şik, 73), İnkapye, Belosyan (Qrimaldo, 84), Caka, Qarsiya, Terye, Adli (Virts, 73), Bonifas (Ta, 41).
Ştutqart: Nübel, Ştensel (Kaytel, 83), Ruo, Şabo, Mittelştadt (Kratsiq, 62), Ştiller (Dəniz Undav, 63), Karazor, Levelinq (Katompa Mvumpa, 62), Miyo, Fürix (Dil, 76), Demiroviç.