Ötən həftəsonu Almaniya kubokunun 1-ci mərhələsi ilə yanaşı, superkubok uğrunda oyun da keçirildi.

“Football-plus.az” xəbər verir ki, ötən yay olduğu kimi, bu dəfə də superkubokun qalibi ''Bavariya'' ilə ''Leyptsiq''in duelində müəyyənləşdi. Görüş ''Alyans Arena''da keçirildiyindən Münhen nəhəngi aşkar favorit sayılırdı. Amma ''Leyptsiq'' mükəmməl performans ortaya qoyaraq maydakı qələbənin təsadüf olmadığını göstərdi. 3 ay öncə də ''Leyptsiq'' bundesliqa çərçivəsində səfərdə ''Bavariya'' üzərində inamlı qələbə qazanmışdı. Budəfəki oyun Olmonun benefisinə çevrildi. 25 yaşlı ispaniyalı yarımmüdafiəçi peşəkar karyerasında ilk dəfə het-trik etdi! Təbii ki, əsas diqqətlər Keynə yönəlmişdi. Onun bu qədər illər ərzində ''Tottenhem''də titula həsrət qalmasının ardından yeni klubunda ilk oyundaca titul qazanması maraqlı olardı. Amma ''Bavariya'' tarixinin ən bahalı oyunçusunun debütü uğurlu alınmadı. Keyn 2-ci hissədə meydana çıxandan bir neçə dəqiqə sonra Olmo 3-cü qolu vurdu. Məşhur forvard peşəkar karyerasında keçirdiyi 5-ci finaldan da məğlub ayrıldı! Deyəsən, Keynin titul lənəti ''rekordmayster''ə də sirayət etməyə başlayıb. Çünki ''Bavariya'' son 3 ildə superkuboku heç kimə verməmişdi... Olmo Robert Levandovskidən (2018, ''Ayntraxt''a qarşı) sonra superkubokda het-trik edən 2-ci futbolçu oldu. O həm də ''Alyans Arena''da rəsmi oyunda ''Bavariya''ya qarşı het-trik edən 3-cü oyunçu oldu. Daha öncə bunu bundesliqa çərçivəsində 2018-də ''Fortuna''nın heyətində Dodi Lukebakio və 2019-da ''Haydenhaym''ın heyətində Robert Qlatsel bacarmışdı. Tomas Tuxelin ''Bavariya''nın başında göstəriciləri heç də ürəkaçan deyil. Komanda bu məşqçi ilə 13-cü rəsmi oyunda 5-ci məğlubiyyətlə üzləşdi. Bu, son 32 ildə münhenlilərin bütün məşqçiləri arasında ən pis göstəricidi! Onu da bildirək ki, 2009-cu ildə yaradılan ''Leyptsiq'' tarixində 3-cü titulu qazandı.

Bavariya - Leyptsiq 0:3
Olmo, 3; 44; 68-p.
Bavariya: Ulrayx, Pavar (Mazraui, 46), Upamekano, De Liqt (Kim Min Çje, 46), Devis, Kimmix (Qoretska, 78), Laymer (Koman, 46), Sane, Musiala, Qnabri, Tel (Keyn, 63).
Leyptsiq: Blasvix, Henrixs (Klostermann, 85), Simakan, Orban, Raum, Simons (Forsberq, 78), Zayvald, Şlager, Olmo (Karvalyo, 78), Openda (Poulsen, 64), Verner (Şeşko, 64).