“Qarabağ” srağagün Avropa Liqasının qrup mərhələsinin 3-cü turunda “Bayer-04”lə qarşılaşdı – 1:5. Oyun haqda, demək olar ki, hər şeydən bəhs etmişik.

Almaniya mətbuatında da bəzi yazılara rast gəldik. Bunlardan biri də məşhur kicker.de portalının oyundan hazırladığı reportajdı. Görəsən, almaniyalı həmkarlarımız matçı necə dəyərləndirir?

“Dünən “Bayer-04” Avropa Liqasının pley-off mərhələsinə doğru böyük addım atdı. Qarşılaşma meydan sahiblərinin, sadəcə, kağız üzərində yox, həqiqətən də favorit olduğunu sübut etdi. Çünki komanda dominant oyunla inamlı qələbə qazandı.

Qranit Cakanın yersiz top itkisini və qayda pozuntusunu da qeyd etməliyik. Toral Bayramov penalti qərarını məmnunluqla qəbul etdi və “Qarabağ”ın oyundakı yeganə qolunu vurdu! O, ilk dəqiqələrdə Virtsin qoluyla önə keçən almanları özündən çıxardı. Rəqib bundan sonra təhlükəli vəziyyət yarada bilmədi. “Bayer-04” bundesliqada olduğu kimi, qəzəbli oynayırdı. Viktor Bonifas, Amin Adli və Cakanın uğursuz cəhdlərindən sonra Qrimaldo üstünlük qazandıran qolun müəllifi oldu. Lakin bu, leverkuzenlilərin əsəbinin soyumasına kifayət etmirdi. Odu ki, yeni hücumlar, yeni qollar qeydə alındı. Nəhayət, Bonifas da arzusuna çatdı. Beləliklə, bir neçə dəqiqə əvvəl yaşadığı şanssızlığa görə məyusluğu geridə qoydu. Meydan sahibləri ikinci hissəyə bir qədər passiv başlasa da, 10 dəqiqə sonra dinamik oyuna başladı. Öncə Virts 3-cü məhsuldar ötürməsini verdi ki, Qrimaldo dubla imza atdı. Edmond Tapsoba isə 5-ci qolu vuraraq son nöqtəni qoydu. Matç birtərəfli keçdi. Xabi Alonso qələbəyə əmin olduqdan sonra düşünülmüş addım atdı. Mütəxəssis martın 9-dan bəri zədəli olan Şiki meydana buraxdı. “BayArena” onu bağrına basdı. Qrimaldonun əvəzlənərkən məyus olduğu görünürdü. Çünki cəmi 1 dəqiqə əvvəl zərbəsi tirə dəydiyindən het-trik şansını qaçırmışdı. İndi “Bayer-04”ü daha intensiv həftələr gözləyir”.

Nəşrin növbəti xəbərində oyunda 1 qol, 3 məhsuldar ötürməylə yadda qalan Florian Virtsdən bəhs edilir. Onun “Qarabağ” futbolçularını ustalıqla aldatması, dəqiq oyun tərzi vurğulanır: “O, “BayArena”nı, 29039 azarkeşi valeh etdi. Xabi Alonso rəqibin cərimə meydançasına rahatlıqla yol tapan, sırayla oyunçuları keçən futbolçuyla lovğalanır. Əlbəttə, haqlıdı. Çünki Virts “Bayer-04”ün ən istedadlısı, peşəkarıdı. Baş məşqçinin söylədiklərinə şübhə etmək olmur: “Virts futbol kütlələrini özünə daha çox aşiq edəcək. Hələ oynamalıdı. Onu müəllim kimi yox, tamaşaçı kimi izləyəndə mən də valeh oluram”.

KƏNAN BAHADIR