''Fənərbaxça'' Joze Mourinyonun planlarına daxil olmayan futbolçularla yollarını ayırmaqda davam edir.

Ən son Migel Krespo pulsuz ''Fənər''dən ''İstanbul BŞ''yə transfer olunmuşdusa, indi də Joao Pedro ilə yollar ayrılıb. Klubdan verilən rəsmi açıqlamada braziliyaəsilli italiyalı forvardın 2025-ci ilə qədər nəzərdə tutulan müqaviləsinin qarşılıqlı şəkildə ləğv edildiyi açıqlanıb. 32 yaşlı futbolçu 2 il öncə 4,7 milyon avroya ''Kalyari''dən transfer edilmişdi. Özü də ''Fənər'' bu transfer uğrunda mübarizədə ''Qalatasaray''a qalib gəlmişdi. Amma Pedronun Türkiyə karyerası ilk gündən uğursuz alındı və o dərhal zədələndi.

İlk mövsümdə 32 rəsmi oyuna çıxaraq 5 qol vuran futbolçu ötən mövsümü icarə əsasında ''Qremio''da keçirdi. Əslində ''Fənər'' Pedronu sataraq pul qazanmaq istəyirdi. Bu futbolçuya İtaliyanın B seriyası təmsilçisi ''Salernitana'' ciddi maraq göstərirdi. Amma İtaliya klubunda prezident dəyişikliyi yaşandığından onlar danışıqları dayandırdılar. Bu üzdən ''Fənər'' rəhbərliyi Pedro ilə qarşılıqlı şəkildə vidalaşdı.

ƏLİ