Bu qış heyətini Leonardo Bonuççi, Rade Kruniç və Çağlar Söyüncü ilə gücləndirən “Fənərbaxça” indi də özünə lazım olmayan futbolçularla vidalaşmaq prosesinə start verib. Artıq ilk ayrılan futbolçular bəllidi.

Öncə Bartuğ Elmazın mövsümün sonuna qədər “Sivasspor”a icarəyə verildiyini bildirək. “Qalatasaray”ın yetirməsi olan 20 yaşlı mərkəz yarımmüdafiəçisi uğursuz “Marsel” macərasından sonra ötən yay Türkiyəyə qayıdaraq “Fənər”lə üçillik müqavilə imzalamışdı. Amma heyətə düşməkdə çətinlik çəkən Bartuğ bu mövsüm cəmi 8 rəsmi oyuna çıxaraq hesabına 1 məhsuldar ötürmə yaza bilmişdi. İstanbul nəhəngindən ayrılan ikinci futbolçu Migel Krespodu. Portuqaliyalı dayaq yarımmüdafiəçisi mövsümün sonuna qədər “Rayo Valyekano”ya icarəyə verilib. Madrid nəhəngi həm də Kresponu daimi əsasda transfer edə bilmək hüququna yiyələnib. Bu transferlərin maliyyə detalları barədə məlumat verilmir. Bu futbolçuya La Liqanın digər klubları – “Qranada” ilə “Kadis” də maraq göstərirdi. Amma Krespo seçimini “Rayo Valyekano”nun xeyrinə etdi. Qeyd edək ki, “Fənər”lə 2025-in yayına qədər müqaviləsi olan 27 yaşlı futbolçu 2021-ci ildə 1,5 milyon avroya “Eştoril”dən transfer edilmişdi. İlk mövsümdə “Qalatasaray”la səfər derbisinin son saniyələrndə qələbə qolunu vurmaqla fanatların qəlbində taxt quran Krespo “sarı-lacivərdlilər”də ümumilikdə 80 rəsmi oyuna çıxaraq 5 qol, 7 məhsuldar ötürməlik performans sərgilədi.

“Fənərbaxça”dan ayrılmaq üzrə olan digər üç futbolçu isə Əmrə Mor, Coşua Kinq və Rayan Kentdi. Bu futbolçular da, bilindiyi kimi, əsas heyətə düşməkdə çətinlik çəkir. Əmrə Mor sabiq klubu “Fatih Karagümrük”lə razılıq əldə edib. O, qarşıdakı 4-5 ayı icarə əsasında İstanbul təmsilçisində keçirdikdən sonra yayda geri dönəcək. Əmrənin ikinci dövrə üçün məvacibini “Fatih Karagümrük” ödəyəcək. 26 yaşlı vinger bu mövsüm cəmi 8 rəsmi oyuna çıxaraq hesabına 2 məhsuldar ötürmə yazıb. Kinqə Acun Ilıcalının sahibi olduğu “Hall Siti” maraq göstərir. Əslində “Fənər” futbolçunun ayrılmasının əleyhinə deyil. Sadəcə, Kinq çempionşipdə yox, premyer-liqada oynamaq istəyir. Acun özü hazırda onunla danışıqlar aparır. O, ikinci dövrə üçün norveçlinin “Fənər”də qazandığı pulu ona ödəməyə hazırdı. “Hall Siti” daha öncə “Fənərbaxça”dan 3 futbolçu – Ozan Tufan, Allahyar Səyyadmaneş və Bora Aydınlıkı transfer etmişdi. Yeri gəlmişkən, Acunun komandası “Trabzonspor”un vingeri Abdulkadir Ömürün transferini bitirmək üzrədi. Bu futbolçu danışıq aparmaq üçün İngiltərəyə yollanıb. “Fənər”də varlığı ilə yoxluğu bilinməyən Kentə isə təkliflər çoxdu. “Hall Siti”, “Kardiff Siti” və Zaqreb “Dinamo”sunun ardından “İstanbul BŞ” də ingiltərəli vinger uğrunda mübarizəyə qoşulub. Bu futbolçulardan başqa Ceyden Oostervoldeyə “Napoli”, Linkoln Enrikeyə isə “Ankaragücü” və “Vasku da Qama” maraq göstərir. “Fənər”in özünün maraq göstərdiyi futbolçulara gəlincə, Umut Nayırın “Pendikspor”a yollanmasının ardından komanda sabiq futbolçusu Sərdar Dursunu geri gətirmək istəyir. 32 yaşlı forvard hazırda “Fatih Karagümrük”ün şərəfini qoruyur. Bundan başqa, “Fənər” Kresponun yerinə “İstanbul BŞ”dən Berkay Özcanı transfer etmək üçün çalışmalara başlayıb.

ƏLİ