“Qarabağ” Çempionlar Liqasının 3-cü təsnifat mərhələsində “Ludoqorets”ə uduzdu – 1:2.

Əvvəla, bunu gözlənilməz məğlubiyyət adlandıranlarla razı deyiləm. Ona görə ki, Bolqarıstan təmsilçisi bir çox meyarlarda “köhlən atlar”dan üstündü. Bəli, avrokubok təcrübəsində ağdamlılar üstündü. Onlar dünənə qədər bu səviyyədə 178, bolqarlar isə 149 oyun keçirmişdi. Büdcə məsələsində isə birmənalı şəkildə rəqib üstündü.
Qurban Qurbanovun komandası son illərdə, xüsusilə ötən mövsüm “Bayer-04” və “Braqa” kimi komandalara qarşı möhtəşəm oyun sərgiləyib. Amma belə məqamlar “Qarabağ”ın həmişə eyni səviyyədə qalacağını təsdiqləmir.

Birincisi, körpünün altından çox sular axıb. Araya aylar girib. Ən əsası, futbolçular hələ tam formasını bərpa etməyib. Bunu dərk edən Qurban bəy Misli premyer-liqasının 2-ci turunda “Kəpəz”ə qarşı keçiriləcək oyunun təxirə salınmamasının tərəfdarıdı. Futbolçular oynamalı, özlərini yenidən tapmalıdı. Buna şübhə yoxdu.

Bu gün müzakirə olunacaq məsələ hakim qərarları, Juninyonun əldən verdiyi qol imkanları, Zubirin qətiyyətsizliyi, Romaounun qayda pozuntularına ifrat meyilliyi, meydançanın həddən artıq sulu olması, Qurban bəyin əvəzetmələrlə bağlı anlaşılmaz seçimləri, nəhayət, “Ludoqorets”in əvvəl sərt oyunla “Qarabağ”ı çəkindirib, sonra az sayda hücum cəhdini dəyərləndirərək qalib gəlməsi deyil. Hər iki komandanın baş məşqçisinin dediyi kimi, cütün taleyinə Razqradda aydınlıq gələcək. Odu ki, “köhlən atlar” qarşıdakı təxminən bir həftədən maksimum istifadə edib mərhələdə adlamalıdı.

Hə, bir də, “dünən “Ludoqorets” üçün əlamətdar gün idi. Kollektiv avrokuboklarda yubiley oyununu keçirdi. Daha dəqiqi, 150-ci dəfə bu turnirdə meydana çıxdı. Həmçinin klubun əsas sponsoru və həmsahibi Georgi Domusçiyevin (“Forbes”ə inansaq, 2,1 milyard dollar sərvəti var) doğum günü idi.
Razqradda görüşənədək, “dəli meşənin qartalları”!

KƏNAN BAHADIR