"Öncəliklə komandalar və onların çıxış etdiyi çempionatlar arasında gecə-gündüz kimi fərq var. Nə "Qarabağ" "Bayer-04"dən güclüdü, nə də premyer-liqamız bundesliqadan üstündü. Almaniya təmsilçisi turnirin ən güclü üç komandasından biridi. Düşünürəm ki, onlar ən azı 1/4 finala, ən yaxşısı isə finala qədər irəliləyəcək. "Köhlən atlar"a gəlincə, onlar bacardığı qədər yaxşı oynamağa çalışdılar. Çoxları qınaya bilər ki, açıq futbol yox, komanda şəklində müdafiə olunub heç-heçəyə ümid etməliydi. Gəlin "Qarabağ"la millimizi eyniləşdirməyək. Yığmamız 6-7 nəfərlə müdafiə olunub 1 xal axtarışında ola bilər. Amma Qurban Qurbanov fərqli düşünən mütəxəssis, özünəməxsus bəlli oyun fəlsəfəsi olan məşqçidi. O heç vaxt qorxaq futbola üstünlük verən deyil. Bəlkə də daha ehtiyatlı oyun, fərqli taktiki gedişlər etməklə fərqli hesab görə bilərdik. Amma Ağdam təmsilçisinin "Bayer-04"ü üstələməsindən söhbət belə gedə bilməzdi".