“Qarabağ” bu gün Çempionlar Liqasının 2-ci təsnifat mərhələsində ilk oyununu keçirəcək. Rəqib “Linkoln Red İmps”di.

Bəli, söhbət “köhlən atlar”ın ötən il mübarizədən kənarlaşdırdığı “qırmızı şeytanlar”dan gedir – 2:1, 4:0! Təkrarçılıq etmədən əsas məsələyə keçək.
Ölkəmizdə heç kim ağdamlıların bu rəqibi hər iki matçda məğlub edəcəyinə şübhə etmit. Hər kəs Qurban Qurbanovdan və komandasından əmindi. Təbii ki, burda rəqibin bizimkilərə nisbətən xeyli zəif olması və ötənilki nəticələr böyük rol oynayır.

Lakin heç bir səbəb xalqın komandaya sonsuz güvənini kiçildə bilməz. Hər halda, “Qarabağ” bu mənəvi dəyəri “ilmək-ilmək toxuyub”. Durum elədi ki, azarkeşlər nə “Linkoln Red İmps”, nə də “köhlən atlar”ın növbəti mərhələyə adlayacağı halda qarşılaşacağı “Lüdoqorets” (Bolqarıstan) – “Dinamo-Minsk” ( Belarus) cütünün qalibi ilə maraqlanır. Artıq tərəfdarlar növbəti mərhələlər üçün planlar qurur, təxminlər irəli sürür. Arzulanan isə təbii ki, Çempionlar Liqasının qrupudu. Ötən mövsüm Avropa Liqasının 1/8 finalına yüksələn “Qarabağ” azarkeşləri yalnız bu halda “doyura” bilər. Alınacaqmı? Təki! Hələ ki püşk üzümüzə gülür. Həm 2-ci, həm də 3-cü təsnifat mərhələsindəki rəqiblər “yağlı əppək”di. Bu mənada “Zirə” bizi yanıltsa da, “Qarabağ”ın potensialı fərqlidi. Geriyə qapıçı və hücumçu transfer etmək qalır ki, ağdamlılar bunun üçün tələsməlidi. Vallah, indi tam zamanıdı. Belə azarkeş sevgisi və püşk bəxtiylə yolda nə daş qalar, nə də qaya...
Göz dəyməsin!

KƏNAN BAHADIR