“Qarabağ”ın Portuqaliyada “Braqa” ilə qarşılaşacağı gün idi.

Nəinki futbol ictimaiyyəti arasında, ölkədə qızğın müzakirələr gedirdi. Çoxu düşünürdü ki, “köhlən atlar” səfərdən qələbə ilə qayıda bilməyəcək. Qısası, ümidlər yox dərəcəsindəydi. Həmkarlarımdan biriylə söhbətdə biz də oyun haqda danışdıq. Gecə gördüyü yuxunu mənimlə bölüşdü. Dedi ki, “Braqa”nın “Qarabağ”ı 7:0 udacağını görmüşəm. Gülümsəyib belə cavab verdim: “Braqa” “Bayer-04” deyil ki...”

Etiraf edim ki, “aspirinlər”in Avropa Liqasının qrup mərhələsində “BayArena”da bizimkiləri 5:1 hesabıyla məğlub etməsi mən də belə fikir formalaşdırmışdı: “Qarabağ”ın “Bayer-04”ü məğlub etməsi mümkün deyil...

Qurban Qurbanovun komandası öncə Portuqaliyadan 4:2 hesablı qələbəylə qayıdaraq, sonra “Braqa”nı mübarizədən kənarlaşdıraraq tarix yazdı. Axırıncı dəfə isə Xabi Alonsonun yetirmələriylə bərabərə qaldı. Bu, məni ümidli olmağa məcbur edir. Bəli, çox çətindi, amma qələbəyə inanmaq mənə məntiqsiz gəlmir!

Düzdü, “Braqa” “Bayer-04” deyil ki...” ifadəsini işlətdiyimə görə peşmanam. Özü də Xabi Alonsoya Avropa Liqasının qalibi olmağı arzulayan Qurban Qurbanovun peşman olduğu qədər... Lakin baş məşqçinin dediyi kimi: nə biləydik ki, Almaniyanın məğlubedilməzi yenidən qarşımıza çıxacaq? İndi inanmaq istəyirəm ki, “Bayer-04” “Braqa” olmasa da, Avropa Liqasındakı taleləri eyni olacaq... İrəli, “Qarabağ”!

Qələbə möcüzəyə bərabər olacaq. Məşhur mahnıda deyildiyi kimi: baş verə kaş belə bir möcüzə...

KƏNAN BAHADIR