Bu gün təmsilçilərimizin üç avrokubok matçı var.

"Football-plus.az" xəbər verir ki, “Qarabağ” Avropa Liqasının 3-cü təsnifat mərhələsində HİK-lə qarşılaşacaqsa, “Sabah” və “Neftçi” Konfrans Liqasının eyni təsnifat mərhələsində uyğun olaraq, “Partizan” və “Beşiktaş” ilə üz-üzə gələcək.

UEFA bir neçə gün öncə sözügedən oyunlar üçün hakim təyinatlarını açıqlayıb. Belə ki, “köhlən atlar”ın Tofiq Bəhramov adına Respublika stadionundakı oyununu israilli Roi Reynsreyber idarə edəcək. Ona həmyerliləri David Elias Biton və Saqi Metzamber yardım göstərəcək. Erez Papir 4-cü hakim funksiyasını yerinə yetirəcək. “Tələbələr”in qarşılaşması isə Gürcüstandan olan hakimlər briqadasına həvalə edilib. Görüşün baş hakimi Giorgi Kruaşvili olacaq. O, yan xətt hakimləri Levan Varamişvili ilə Zaza Pipianın yardımından faydalanacaq. 4-cü hakim isə Aleko Aptsiauridi. Nəhayət, “ağ-qaralar”ın sınağına İsveçrədən olan hakimlər briqadası təyinat alıb. Lukas Fandrix baş, Conas Erni və Guillom Mayre köməkçi hakim olacaqlar. Ehtiyat referi funksiyasını Yonnas von Mandax yerinə yetirəcək. Beləliklə, ənənəvi hakim təhlilinə keçid alaq.

Roi Reynsreyber – 43 yaşlı ədalət təmsilçisi 9 ildi bu işlə məşğuldu. İsrail çempionatının məşhur hakimi əsasən qalmaqallarla yadda qalıb. O, qərarları üzündən tez-tez yerli futbol mütəxəssislərinin müzakirə obyektinə çevrilir. Burda idarə etdiyi 161 matçda 915 sarı, 57 qırmızı vərəqə göstərən fit sahibi futbolçuların və baş məşqçilərin başağrısıdı. Reynsreyber ölkəsində o qədər də bəyənilməsə də, UEFA-nın güvəndiyi adlar sırasına qoşulmağı bacarıb. Karyerası boyunca Çempionlar (5), Avropa (18), Konfrans (3), Millərlər (3) Liqasının matçlarını, 7 beynəlxalq yoldaşlıq oyununu, 17 (2), 19 (4) və 21 (3) yaşadək futbolçular arasında Avropa çempionatının görüşlərini idarə edib. “Xidməti siyahısında” Avropa Liqasının 2018/19 mövsümünün “Qarabağ” – “Vorskla” (0:1) matçı da var. Bakıda keçirilən görüşdə Poltava təmsilçisi tarixi uğura imza atıb. Qurban Qurbanovun komandasını məğlub edən rəqib ilk dəfə Avroliqanın qrup mərhələsində qələbəyə sevinib. Oyunda təmsilçimiz 1, rəqib isə 4 sarı vərəqə ilə cəzalandırılıb. Ümid edək ki, israilli hakimin Azərbaycana ikinci səfəri “köhlən atlar”a uğur gətirəcək. Ümumiyyətlə, 329 matçda meydana çıxan ədalət təmsilçisi 1638 sarı, 94 qırmızı vərəqə göstərib.

Giorgi Kruaşvili – 37 yaşlı hakim Gürcüstan premyer-liqasının ünlülərindəndi. Təmkini və düzgün qərarları nəticəsində yerli futbol camiəsinin sevimlisinə çevrilib. Gürcülərin premyer-liqasına 117 dəfə meydana çıxan fit sahibi 463 sarı, 25 qırmızı vərəqə ilə oyunçuları məyus edib. Kruaşvili indiyə qədər Çempionlar (3) Avropa (8), Konfrans (5), Millətlər (2), Gənclər (9) Liqasının, həmçinin 17 (6), 19 (6) və 21 (7) yaşadək futbolçular arasında Avropa çempionatının oyunlarını idarə edib. Onun adına Azərbaycan futbol tarixində də rast gəlirik. 2012-ci ildə Azərbaycan və Bəhreyn milliləri arasında keçirilən görüşdə (3:2) köməkçi hakim kimi meydana çıxmışdı. Bundan başqa, Gənclər Liqasının 2018/19 mövsümündə “Qəbələ”nin U-19 komandası “Şerif”lə qarşılaşarkən ədaləti məhz o təmin etmişdi. Matç 1:1 hesabı ilə bitmişdi. Kruaşvili bizimkilərə 2, rəqibə isə 1 sarı vərəqə göstərmişdi. Ümumiyyətlə, “qarapaltarlı” karyerası boyunca idarə etdiyi 291 matçda 1126 sarı, 53 qırmızı vərəqə üçün əlini cibinə salıb.

Lukas Fendrix – maraqlıdı ki, ötən ay “Qarabağ”ın Çempionlar Liqasının 2-ci təsnifat mərhələsində “Rakuv”a Polşada 2:3 uduzduğu qarşılaşmanı da isveçrəli hakim idarə edib. Ötən saylarımızdan birində onunla bağlı ətraflı məlumat vermişdik. Ümid edirik ki, bu dəfə Azərbaycan klubuna – “Neftçi”yə uğur gətirər.

KƏNAN BAHADIR