“Oyunu böyük həvəslə izlədim. Həmin gün üç oyun olsa da,  "Sumqayıt"-"Fehervar" görüşünə xüsusilə marağım vardı. Ona görə ki, komanda ilk dəfə yeni stadionda, doğma şəhərdə belə matça çıxırdı. "Kimyaçılar" əvvəldən qorxmadan, cəsur futbol oynadı. Heyətdəki əksər futbolçuların avrokubok təcrübəsi olmasa belə, tamaşaçı qarşısında böyük əzmkarlıq göstərdilər. Klubun öz yetirməsi Səbuhi Abdullazadənin qolundan sonra daha baxımlı, həyəcanlı oyun izlədik. Amma qırmızı vərəqə bütün bunları alt-üst elədi. Ümumi götürsək, Xaçayevə hər iki sarı vərəqə qaydalar çərçivəsində göstərildi. Baxmayaraq ki, hakim 26 yaşlı gənc idi. Bütün hallarda oyunun ruhuna uyğun hakimlik eləmək olar. Bəli, ikinci "sarı" ilə mən də razıyam. Top uğrunda mübarizə, onun dirsəyi, artıq fiziki güc tətbiq eləmək və s. Lakin Avropa oyunlarında, belə oyunda diqqətli olmaq vacibdi. Komandalarımız avrokuboklarda yaxşı oynamaq, nəticə qazanmaq istəyirlər. Bununla yanaşı, psixoloji vəziyyətlərini düzəltməlidilər. Komanda 1:0 öndə olarkən hər kəs diqqətli oynamalıdı. Meydanın mərkəzində mübarizəni uduzsaydı, nə olacaqdı? Bunlardan da danışmaq lazımdı. Həmin məqamda hakim də epizoda yaxın idi. Hətta VAR belə müdaxilə etmədi. Çünki qərari kəskin oldu. Təəssüf ki, belə nəticə ilə üzləşdik. Bütün bunlara baxmayaraq, "Sumqayıt" 10 nəfərlə, hətta 45-ci dəqiqədə 2-ci topu vura bilərdi. Qapı istiqamətində yaxşı zərbə oldu, amma qapıçı topu tuta bildi. Çox təəssüf ki, komanda belə oyunda uzun müddət azlıqda qaldı. "Fehervar" isə həm taktiki, həm də atletik cəhətdən müasir futbol üslubuna uyğun oynayırdı. Düşünürəm ki, səfərdə "Sumqayıt"ın işi çox çətin olacaq”.