“Sumqayıt” “Mehdi Hüseynzadə” ilə bağlı mövzuya aydınlıq gətirdi – “iyulun 10-u...”
“Sumqayıt” Konfrans Liqasının 2-ci təsnifat mərhələsində “Fehervar”a (Macarıstan) qarşı ev oyununu Mehdi Hüseynzadə adına şəhər stadionunda keçirmək istəyir. Lakin bunun üçün idman qurğusuna baxış keçirən UEFA-nın təftiş qrupunun aşkarladığı nöqsanlar aradan qaldırılmalıdı.
Görəsən, bu yöndə hansı yeniliklər var? Matçın “Mehdi Hüseynzadə”də keçirilməsi mümkün olacaqmı? UEFA nümayəndələrinin Sumqayıta növbəti səfəri gözlənilirmi?
Sualları “kimyaçılar”ın mətbuat xidmətinin rəhbəri Zaur Xudiyevə ünvanladıq. Onun “Football-plus.az”a söylədikləri:
“Stadionla bağlı işlər qaydasındadı. Çalışmalar davam edir. Plana uyğun şəkildə irəliləyirik. Proses təxminən iyulun 10-na qədər tamamlanmalıdı. Ümumiyyətlə, indiyə qədər bütün məlumatlar UEFA-ya ötürülüb. İş başa çatandan sonra da yekun nəticə haqda bilgi verəcəyik. Sonrakı məsələ artıq qurumun özüylə bağlıdı. İstəsələr, dərhal sonra yoxlayarlar. Və ya oyuna gələcək nümayəndə 1-2 gün əvvəldən gəlib təftiş edər. Əsas odu ki, bizim stadionla bağlı hansısa problemimiz olmayacaq. İnşallah, çalışmaları vaxtında bitirəcəyik”.
Qeyd edək ki, “Sumqayıt” “Fehervar”ı iyulun 25-də sınağa çəkəcək.
KƏNAN BAHADIR
Digər xəbərlər
