“Sumqayıt”ın Konfrans Liqasının 2-ci təsnifat mərhələsindəki rəqibi “Fehervar” uğursuzluqla üzləşib.

“Football-plus.az”ın məlumatına görə, Macarıstan klubu iyulun 1-də transfer etdiyi Corc Dobso ilə vidalaşmaq məcburiyyətində qalıb. Buna futbolçunun gözlənilməz müraciəti səbəb olub.

Belə ki, Dobso klub rəhbərliyiylə görüşdə müqaviləsinin ləğv edilməsini və “Çarlton”dan (Avstriya) gələn təklifi qəbul etmək niyyətində olduğunu bildirib. Növbəti mövsüm üçün Macarıstan premyer-liqası və avrokuboklarla bağlı hədəfləri və oyunçunun belə şəraitdə özünü tam göstərə bilməyəcəyini nəzərə alan “Fehervar” onun qərarına hörmətlə yanaşıb və istəyini qəbul edib. Belədə klub təcili mərkəz müdafiəçisi axtarışına çıxıb.

Qeyd edək ki, “kimyaçılar” rəqibiylə iyulun 25-də evdə, 31-də isə səfərdə qarşılaşacaq.

KƏNAN BAHADIR