Konfrans Liqası
2-ci təsnifat mərhələsi, ilk oyun
Sumqayıt – Fehervar (Macarıstan) 1:2 (1:1)
1. Mehdi Cənnətov
7. Rövlan Muradov
14. Elvin Bədəlov (k)
17. Murad Xaçayev
3. Slavişa Radoviç
(6. Vüqar Mustafayev, 63)
19. Roy Kehat
8. Səbuhi Abdullazadə
11. Fernando Medeyros
(60. Tresor Mossi, 85)
23. Cordan Rezabala
9. Nikola Vuynoviç
(21. Nihad Əhmədzadə, 46)
10. Rəhim Sadıxov
(30. Kamran Quliyev, 85)

Ehtiyat oyunçular
32. Murad Ağamaliyev
36. Xəyal Fərzullayev
24. Sənan Muradlı
41. Uğur Cahangirov
Baş məşqçi: Samir Abasov

22. Balaj Tot
7. Sabolç Şen
4. Çaba Şpandler
31. Nikola Serafimov
8. Boqdan Melnik
99. Milan Petö
(74. Bense Baboş, 66)
27. Bentse Bedi
(3. Kasper Larsen, 66)
14. Aron Çonqvay (k)
20. Tobias Kristensen
77. Matyaş Katona
(15. Matyas Kovaç, 57)
9. Neys Qradişar
(19. Patrik Kovaç, 85)

Ehtiyat oyunçular
57. Martin Dala
75. Daniel Veszelinov
11. Nikolas Stefanelli
16. Mario Simut
18. Bense Kovaç
21. Andras Husti
31. Corc Ominger
Baş məşqçi: Tamaş Petö

Qollar: S.Abdullazadə, 20 (1:0). T.Kristensen, 39 (1:1). Ş.Şpandler, 52 (1:2).
Vərəqələr: M.Xaçayev, 8. N.Serafimov, 15. N.Vuynoviç, 22. M.Cənnətov, 32. M.Petö, 65. R.Muradov, 67. K.Larsen, 68. S.Abdullazadə, 73 – sarı. M.Xaçayev, 32 – qırmızı (ikinci sarı).
Hakimlər: FLORİAN LATA, Xulio Mani, Reydi Zaimi, Kreşnik Çyapi (hamısı Albaniya).
Hakim-inspektor: İqor Satçi (Moldova).
UEFA nümayəndəsi: Hayri Çavuşoğlu (Türkiyə).
25 iyul. Sumqayıt. Mehdi Hüseynzadə adına şəhər stadionu. 9200 tamaşaçı.
Birinci hissəyə 2, ikinci hissəyə 4 dəqiqə əlavə olunub.

7 (3) qapıya (“çərçivə”yə) zərbə 21 (7)
2 künc zərbəsi 4
1 ofsayd 2
8 qayda pozuntusu 9
6 (1) sarı (qırmızı) vərəqə 3 (0)
42 topa sahibolma (faizlə) 58

“Sumqayıt” “doğma divarlar” arasında çətin rəqiblə üz-üzə gəldi. Komanda evdə sərfəli nəticə əldə etməsə, “Fehervar”ının meydanında şanssız olacaqdı. Dəqiqələr “kimyaçılar”ın planına uyğun irəliləyirdi. Rəqib isə hələ kəşfiyyat xarakterli oyun sərgiləyirdi. Bu ərəfədə Rəhim hesabı açmağa yaxın olsa da, qeyri-dəqiqlik imkan vermədi. Bununla yanaşı, qonaqların müdafiə xəttinin düşünüldüyü qədər möhkəm olmaması da ortaya çıxdı. Çatışmazlıqdan 20-ci dəqiqədə Səbuhi ustalıqla istifadə etdi. “Sumqayıt”ın yetirməsi Medeyrosun küncdən zərbəylə oyuna daxil etdiyi topu saxlamadan “çərçivə”yə göndərdi. Belədə Səbuhi “kimyaçılar”ın avrokuboklardakı ilk qolunun müəllifi oldu!

Bir qədər sonra isə “Fehervar”ın hücumuna şahidlik etdik. Hesabı bərabərləşdirmək istəyən qonaqlar Bediylə buna nail ola bilərdi ki, Mehdi akrobatik seyvlə zərbəni dəf etdi. Melnikin qapını doğru nişan ala bilməməsinin ardından oyunun taleyini həll edən hadisə yaşandı. Belə ki, Murad Qradişarla hava mübarizəsindən qalib ayrılmaq üçün tullandı. Lakin dirsəyi ilə rəqibə xəsarət yetirən futbolçu ikinci sarı vərəqəylə üzləşib meydandan qovuldu. Bununla “Fehervar”ın qol-qanad açdığını desək, yanılmarıq. Əvvəl Katona və Çonqvay qol müəllifi olmaq istədi. Qeyri-dəqiqliyin mane olduğu futbolçuların günahını isə Kristensen “yudu”. O, 39-cu dəqiqədə Bedinin cərimə meydançası daxilinə ötürməsini başla zərbəylə “çərçivə”yə göndərdi. Bir qədər sonra Petö bəxtini sınadı ki, bu dəfə Mehdi “çərçivə”yə tuşlanan topu kənarlaşdıra bildi. Növbəti təhlükədə də Cənnətov yerində idi. Birinci hissəyə əlavə olunan vaxtda Rezabala fürsəti boşa verdi. Daha doğrusu, Tot komandasını qoldan xilas etdi. Beləliklə, komandalar fasiləyə “sülh”lə yollandı.

İkinci hissə tam qonaqların üstünlüyü şəraitində keçdi. “Fehervar” aqressiv oyun tərziylə diqqəti çəkdi. Belədə oyuna nəzarəti ələ alan macarlar növbəti dəfə fərqləndi. Bedinin zərbəsini dəf edən Mehdi yenicə toparlanırdı ki, Şpandler topu başla tora qovuşdurdu. O, 52-ci dəqiqədə Rezabalanın kobud müdaxiləsi üzündən qazanılan və Bensenin yerinə yetirdiyi cərimə zərbəsindən maksimum yararlandı. Hadisələrin axarı “Sumqayıt”ın yorğunluğu fonunda “Fehervar”ın təzyiqi artırmasıyla müşayiət olundu. Meydan sahiblərinin yetərli oyunçu ehtiyatına malik olmaması işi daha da çətinləşdirdi. Buna baxmayaraq, Çonqvay və Petönün qeyri-dəqiq cəhdlərindən sonra “kimyaçılar” üçün şans yarandı. Lakin bu dəfə də Radoviç Totu yenməkdə çətinlik çəkdi. 78-ci dəqiqədə Larsenin zərbəsi dirəyə tuş gəlməsəydi, durum daha faciəvi ola bilərdi.

Hakimin final fiti “Sumqayıt”ın məğlubiyyətini rəsmiləşdirdi. İndi “kimyaçılar”ı çətin Macarıstan səfəri gözləyir. Qeyd edək ki, cavab oyunu iyulun 31-də keçiriləcək.

KƏNAN BAHADIR