Futbol ictimaiyyətinin səbrsizliklə gözlədiyi gün gəlib çatdı!

"Football-plus.az" xəbər verir ki, “Qarabağ” bu gün Çempionlar Liqasının 2-ci təsnifat mərhələsində ilk oyununu keçirir. Rəqib “Linkold Red İmps”di. Ağdam təmsilçisinin səfər matçını “CBC Sport” yayınlayacaq.

Linkoln Red İmps (Cəbəllüttariq) – Qarabağ 0:2
Olavio Juninyo, 45+2. Toral Bayramov, 75.
Hakimlər: İstvan Vad, Vencel Tot, İstvan Albert, Bence Şonka (hamısı Macarıstan).
23 iyul. Cəbəllütariq. “Europa Sports Park”. Saat 20.00.

Oyunun favoriti “Qarabağ”dı ki, heç kim, bəlkə hətta cəbəllütariqlilər də buna şübhə etmir. Ötən mövsüm Çempionlar Liqasının 1-ci təsnifat mərhələsində də üz-üzə gələn komandaların oyunlarında “köhlən atlar”ın səfərdə 2:1, evdə 4:0 hesablı qələbəsi qeydə alındı. Bu dəfə mənzərənin fərqli olması ehtimalı azdı. Ona görə ki, komanda yenidən Cəbəllüttariq çempionatında qalib olsa da, yetərincə güclənməyib. Hələ ilk təsnifat mərhələsində “Hamrun Spartans”ı penalti seriyasında məğlub edən “qırmızı şeytanlar”ın şansı azdı.

Oyunöncəsi duruma gəlincə, “Qarabağ”dan Amin Ramazanovla Musa Qurbanlı zədəli, Elvin Cəfərquliyev isə cəzalı olduğundan görüşü buraxacaq. Avstriya toplanışı zamanı “Slaven”lə yoxlama oyunundan sonra diz qapağında ağrılar hiss edən Musa Bakıda müayinə olunub. Əməliyyat zərurəti yaranan hücumçu 4-6 həftə yaşıl meydanlardan kənarda qalacaq.

Onu da qeyd edək ki, ağdamlılar dünən Cəbəllüttariqə yollanıb və “Elliott” otelində məkunlaşıb. “Linkoln Red İmps”ə gəlincə, ölkənin ən titullu klubudu, 2022/23 mövsümündə Konfrans Liqasının qrup mərhələsinə vəsiqə qazanıb. Yenə də onun “köhllən atlar”ın öhdəsindən gələcəyinə inananmağa dəyməz!

“Qarabağ”ın baş məşqçisi Qurban Qurbanov, çox güman, bu start heyətinə güvənəcək:

Fabian Buntiç, Toral Bayramov, Bəhlul Mustafazadə, Bədavi Hüseynov (k), Marko Veşoviç, Yassin Benzya, Julio Romao, Marko Yankoviç, Abdulla Zubir, Leandro Andrade, Juninyo Olavio.

KƏNAN BAHADIR