''Beşiktaş'' nəhayət ki, bu yayın ilk qələbəsini qazanıb.

Sloveniya toplanışında Zaqreb ''Dinamo''su ilə oyunu güclü yağış üzündən ləğv edilən və ''Şaxtyor''a 0:1 hesabı ilə uduzan İstanbul nəhəngi dünən Avstriya təmsilçisi QAK ilə qarşılaşıb. ''Ağ-qaralar'' bu oyunla birlikdə toplanışı başa vuraraq vətənə qayıdıblar. Ötən mövsüm Avstriyanın aşağı liqasında çempion olan və elitada oynamağa haqq qazanan QAK 3-cü dəqiqədə hesabı açsa da, erkən qol vurmağına peşman olub. Çünki artıq 26-cı dəqiqədə 4:1 öndə olan ''Beşiktaş'' yekunda 5:1-lik inamlı qələbə qazanıb. Mustafa Həkomiğlu ilə Raşitsa dubl edibsə, daha bir qolu aktivinə yeni transfer Rafa Silva yazıb.

17 yaşlı Mustafa Həkimoğlu öz performansı ilə diqqət çəkməyi bacarıb. Deyəsən, Semih Kılıçsoyun ardından ''Beşiktaş''da daha bir ulduz yetişir. Klubun öz yetirməsi olan Həkimoğlu 9-20-ci dəqiqələr aralığında 2 qol, 1 məhsuldar ötürməlik mükəmməl performans sərgilədi. Oyundan sonra baş məşqçi Covanni van Bronxorst da onun haqda xoş fikirlər səsləndirdi. Həkimoğlu ötən mövsüm əsas komandada 8 rəsmi oyunda iştirak etmiş və ümumilikdə cəmi 152 dəqiqə meydanda olmuşdu. Yeni mövsümdə onun daha çox şans qazanacağı gözlənilir.

''Beşiktaş'' növbəti hazırlıq oyununu iyulun 27-də 1-ci liqa təmsilçisi ''Gənclərbirliyi''nə qarşı keçirəcək.

ƏLİ